मूलाका फाइदा र त्यससँग के नखाने

पोखरा । जाडो मौसममा विभिन्न प्रकारका हरियो पातयुक्त र जमिनमुनि फल्ने पौष्टिक तरकारीहरू बजारमा उपलब्ध हुन्छन्। यी तरकारीहरूले स्वस्थ जीवनशैली अपनाउनमा महत्त्वपूर्ण भूमिका खेल्छन्। यस्तो मौसममा मूला पनि सजिलै पाइन्छ, जसलाई सलाद, अचार, वा काँचै नुन मिसाएर खाने चलन छ। मूलामा प्रोटिन, क्याल्सियम, भिटामिन ए, बी, सी, आइरन, फाइबर, पोटासियम जस्ता पोषक तत्व प्रचुर मात्रामा पाइन्छ, जसले पाचन प्रणालीलाई स्वस्थ राख्न र ग्याससम्बन्धी समस्या हटाउन मद्दत पुर्याउँछ।

मूलाको सेवनबाट धेरै स्वास्थ्य लाभ भए पनि केही खाद्य वस्तुसँग यसको संयोजनले स्वास्थ्यमा नकारात्मक असर पार्न सक्छ। जस्तै, मूला खाएपछि तुरुन्तै दूध नपिउनु राम्रो मानिन्छ। मूलाको तासीर तातो हुने भएकाले यसलाई दूधसँग मिसाएर खाँदा हृदयाघात, एसिड रिफ्लक्स, पेट दुखाइ जस्ता समस्या निम्त्याउन सक्छ। त्यसैले मूला र दूधको सेवनबीच एक वा दुई घण्टाको अन्तर राख्न सल्लाह दिइन्छ।

सलादमा काँक्रा र मूला मिसाएर खान पनि स्वास्थ्यका लागि राम्रो मानिदैन। काँक्रामा पाइने एस्कर्बेटले भिटामिन सीको अवशोषणमा अवरोध गर्छ, जसले शरीरमा भिटामिन सीको प्रभाव घटाउँछ। यसकारण मूला र काँक्रा सँगै सेवन गर्नु हानिकारक हुन सक्छ।

करेला र मूला सँगै खाँदा पनि स्वास्थ्यमा नकारात्मक असर पर्न सक्छ। यी दुवैमा केही प्राकृतिक पोषक तत्त्व हुने भएकाले एकअर्कासँग प्रतिक्रिया गर्दा श्वासप्रश्वास तथा मुटुको समस्यासम्म निम्त्याउन सक्छ।

त्यसैगरी, मूलासँगै सुन्तला खानु पनि स्वास्थ्यका लागि उचित मानिदैन। मूला र सुन्तलाको संयोजनले पेटका समस्या मात्र नभई अन्य स्वास्थ्यसम्बन्धी समस्या निम्त्याउने जोखिम रहन्छ। मूला खाएपछि चिया पिउनु पनि उपयुक्त हुँदैन। मूला र चिया दुवै तातो प्रकृतिका भए पनि एकअर्काका विपरीत मानिन्छन्, जसले ग्यास र कब्जियतको समस्या बढाउँछ। त्यसैले मूला खाएपछि चिया पिउनु हुँदैन।

मधुमेह रोगीहरूले पनि मूलाको सेवनमा ध्यान दिनुपर्छ। अत्यधिक मात्रा मूला सेवन गर्दा रगतमा चिनीको मात्रा घट्न सक्छ। कम रक्तचाप भएका व्यक्तिहरूले मूलाको अत्यधिक सेवन नगर्नु उपयुक्त हुन्छ। मधुमेह भएका व्यक्तिहरूले चिनीको सन्तुलन कायम राख्नका लागि मूला सीमित मात्रामा मात्र खानुपर्छ।

यसरी, जाडो मौसममा स्वास्थ्यका लागि लाभदायक मूला खाँदा यसको सही मात्रा र संयोजनमा ध्यान दिनु अत्यावश्यक छ।

– एजेन्सी

अस्वीकरण (Disclaimer) : यो सामग्री हामीले एजेन्सीबाट लिएका हौँ । यसलाई पूर्ण ठानेर यहाँ बताइए बमोजिम आफैँ अभ्यास नगर्नुहोला, यसलाई आधार मानेर एकपटक सम्बन्धित विषयको चिकित्सकसँग परामर्श लिनुहोला ।