मेक्सिको सिटी । प्रतिष्ठित मिस युनिभर्स प्रतियोगितामा पानामाको प्रतिनिधित्व गर्दै सहभागी भएकी इटलीकी मोराले अचानक प्रतियोगिताबाट बाहिरिनुपरेको छ। प्रतियोगिता सुरु भईरहेको बेला मोरालाई आयोजकले अयोग्य ठहर गर्दै प्रतियोगिताबाट निष्कासन गरेका छन्। यस घटनाले प्रतियोगिता र मोराको फ्यानहरूबीच चर्को चर्चा चलाएको छ।
मोरामाथि बिना अनुमति आफ्ना प्रेमी जुआन अबादियासँग भेटेको आरोप लागेको छ। रिपोर्टका अनुसार उनी प्रतियोगितामा तय भएको होटलभन्दा बाहिर गई छुट्टै होटलमा प्रेमीसँग बसेकी थिइन्। यस कार्यका कारण नै उनलाई प्रतियोगिताबाट निकालिएको बताइएको छ। न्यूयोर्क पोस्टका अनुसार मोराको यो व्यवहारले आयोजकको नियम उल्लङ्घन गरेको भन्दै उनलाई निष्कासन गरियो।
तर, मोराले भने यस आरोपलाई अस्वीकार गर्दै आफूले प्रेमीसँग भेट नगरेको दाबी गरेकी छिन्। उनले आयोजकका एक निर्देशकसँग भएको विवादको कारणलाई निष्कासनको कारण भएको बताएकी छिन्। घटनाको वास्तविक कारणबारे भने अझै स्पष्टता आउन सकेको छैन, जसले यो विवादलाई थप पेचिलो बनाएको छ।
सामाजिक सञ्जालमा मोराको निष्कासनलाई लिएर मानिसहरू विभिन्न प्रतिक्रिया दिइरहेका छन्। धेरैले मोराको समर्थन गर्दै उनको निष्कासनलाई अनुचित ठहर गरेका छन्। तर, मिस युनिभर्स अर्गनाइजेसनले भने पारदर्शिता र नियमलाई पालना गर्दै मोरालाई हटाउने निर्णयलाई सही ठहर गरेको जनाएको छ। मोराको निष्कासनपछि मिस पानामा संगठनले कुनै नयाँ प्रतिस्पर्धी पठाउने निर्णय नगरेको स्पष्ट गरेको छ।
मिस युनिभर्स प्रतियोगिताको फाइनल आगामी नोभेम्बर १६ मा मेक्सिकोमा सम्पन्न हुँदैछ, जहाँ मोराको अनुपस्थितिले प्रतियोगिता झनै चासोको विषय बनेको छ।
