मंसिर ७, काठमाडौं – सत्तारूढ दल नेकपा एमालेले आज काठमाडौंमा शक्ति प्रदर्शन गर्दैछ। अराजकताविरुद्ध जागरण सभा नाम दिइएको यस प्रदर्शनमा एमालेले उपत्यकाका तीनै जिल्लाबाट कार्यकर्तालाई उतारेर ठूलो जनप्रदर्शन गर्ने तयारी गरेको छ। पार्टीका अनुसार, सभा बिहान साढे ११ बजे भद्रकालीमा भेला भएर दरबारमार्गमा समापन गरिनेछ। एमालेले यस सभामा १ लाख कार्यकर्ता सहभागी हुने दाबी गरेको छ।
एमालेको जनप्रदर्शनलाई प्रभावकारी बनाउन हरेक जनवर्गीय संगठनलाई कार्यकर्ताहरू ल्याउन उर्दी गरिएको छ। पार्टी प्रचार विभाग प्रमुख राजेन्द्र गौतमका अनुसार, सभा सुरुमा भृकुटीमण्डपमा आयोजना गर्ने योजना भए पनि सर्वसाधारणको आवागमनलाई सहज बनाउने उद्देश्यले दरबारमार्गमा सारिएको हो। सभामा प्रधानमन्त्री तथा पार्टी अध्यक्ष केपी शर्मा ओली र महासचिव शंकर पोखरेलले सम्बोधन गर्नेछन्।
पछिल्लो समय सरकारको आलोचना बढिरहेको अवस्थामा सत्तारूढ दल स्वयं सडकमा ओर्लिएको छ। कतिपयले यसलाई सरकारलाई घेरेका आरोप र आलोचनाविरुद्ध पार्टीले आफ्नो शक्ति प्रदर्शनका रूपमा व्याख्या गरेका छन्।
यसैबीच, मेडिकल व्यवसायी दुर्गा प्रसाईंका समर्थकहरूले पनि आज कोटेश्वर क्षेत्रमा प्रदर्शन गर्ने तयारी गरेका छन्। प्रधानमन्त्री ओलीले प्रसाईंले कम्बोडियामा २१ करोड अमेरिकी डलर लगानी गरेको आरोप लगाएपछि उनी अहिले प्रहरी नियन्त्रणमा छन्। यद्यपि, उनका समर्थकहरूले “राष्ट्र, धर्म र नागरिक बचाउ” भन्ने नारासहित सडकमा प्रदर्शन गर्ने घोषणा गरेका छन्।
यता माइतीघरमा सहकारी ठगीका पीडितहरूले पनि प्रदर्शन जारी राख्ने बताएका छन्। ठगीमा संलग्न व्यक्तिहरूमाथि कारबाही गरी आफ्नो रकम फिर्ता गराउनुपर्ने माग राख्दै उनीहरू लामो समयदेखि आन्दोलनमा छन्।
तीन स्थानमा हुने यी प्रदर्शनहरूले काठमाडौं उपत्यकाको यातायात व्यवस्थापनमा गम्भीर असर पर्ने देखिन्छ। प्रमुख जिल्ला अधिकारी जयनारायण आचार्यले शान्ति र सुरक्षा कायम राख्न आवश्यक सुरक्षा प्रबन्ध गरिएको जानकारी दिएका छन्। विभिन्न राजनीतिक, सामाजिक, र धार्मिक मुद्दामा आयोजित यी प्रदर्शनले उपत्यकामा अस्तव्यस्तता निम्त्याउने अनुमान गरिएको छ।
