काठमाडौं, ७ मंसिर। मुलुकको राजनीतिक परिवर्तनका प्रमुख आन्दोलनहरूमा अग्रणी भूमिका खेल्दै आएको नेपाली कांग्रेस हाल सरकार निर्माणमा भने आफ्नै कार्यकर्ताबाट आलोचित बनेको छ। एमाले र माओवादी केन्द्रजस्ता बामपन्थी दलसँग पालैपालो सहकार्य गर्नु कांग्रेसको आफ्नै चरित्रविपरीत रहेको आवाज उठिरहेको छ। विशेषगरी ओली नेतृत्वको सरकार निर्माणको बेला गरिएको ‘सम्झौता’को कार्यान्वयन र त्यसले ल्याउने स्थायित्वप्रति गहिरो शंका गरिएको छ। संविधान संशोधनजस्ता महत्त्वपूर्ण विषय सरकारको प्राथमिकतामा नपरेको भन्दै कांग्रेसकै नेता-कार्यकर्ता असन्तुष्ट छन्।
सरकार निर्माणताका गरिएका सम्झौता र संविधान संशोधनको वाचा पूरा नगर्दा सरकारप्रति जनआशा घट्दै गएको छ। पुराना नेता र पार्टीहरूप्रति जनता आक्रोशित छन्। यसको फाइदा नयाँ नेताहरूले लिँदै राजनीतिक परिवर्तनको ‘भाष्य’ निर्माण गर्न खोजिरहेका छन्। तर, कांग्रेसभित्र भने गगन थापा र विश्वप्रकाश शर्माजस्ता नेताहरूले युवापुस्ताको नेतृत्व गर्दै आफ्नै पार्टीभित्र सुधारको अभियान चलाइरहेका छन्। यी नेताहरूको ‘जोस र होस’कै कारण कांग्रेसले आफ्नो गुमेको जनाधार पुनः प्राप्त गर्न सक्छ भन्ने विश्वास राखिएको छ।
गगन–विश्व पुस्ताले जनतालाई सुशासन, समृद्धि, र स्थायित्वको अपेक्षाप्रति पार्टी जिम्मेवार रहेको देखाउनुपर्ने आवश्यकता छ। उनीहरू पार्टीभित्र मात्र नभई राष्ट्रिय राजनीतिको प्रमुख धरोहर बन्ने जिम्मेवारीसमेत बोकेका छन्। पार्टीभित्र गुटबन्दीले कमजोर बनाएको नेतृत्वलाई थप सुदृढ बनाउँदै संगठनलाई बलियो बनाउन युवा नेताहरूले संघर्ष गर्नुपरेको छ। गगन र विश्वले पार्टीभित्रको परम्परागत राजनीति बदल्नका लागि लिएको कदमले धेरै युवालाई उत्साहित पारेको छ।
पार्टीका पुराना नेताहरूले नेतृत्वमा बसेर युवा पुस्तालाई अवसर नदिएको आरोप पनि कांग्रेसभित्र बलियो बनेको छ। पार्टीभित्रको नेतृत्व परिवर्तन आवश्यक रहेको र यसको सुरुवात गगन-विश्वले गर्न सक्ने अपेक्षा गरिएको छ। तर, उनीहरूलाई विश्वास दिलाउन र संगठित रूपमा अघि बढ्न पार्टी नेतृत्वले नै साथ दिनुपर्ने देखिन्छ। यदि यो विश्वास निर्माण गर्न असफल भए, गगन–विश्व पुस्ताले पनि अन्य दलका परम्परागत नेतृत्वसँगै मिचिएर जाने खतरा रहन्छ।
देशको वर्तमान अवस्था असहज र चुनौतीपूर्ण छ। सरकार संविधान संशोधन, कूटनीतिक सन्तुलन र आर्थिक स्थायित्वको दिशामा गम्भीर देखिँदैन। यो असफलताले राजनीतिक अस्थिरताको अवस्थामा मुलुकलाई धकेल्ने जोखिम बढेको छ। आमजनता पुराना नेताहरूको भ्रष्टाचार, अकर्मण्यता र अनियमितताबाट आजित छन्। तसर्थ, अहिले युवाले मात्र होइन, राजनीतिक दलका शीर्ष नेतृत्वले समेत यो चुनौतीलाई अवसरमा बदल्न कदम चाल्नुपर्ने देखिन्छ।
नेपाली कांग्रेसले परिवर्तनशील राजनीतिक अवस्थामा युवा नेतृत्वलाई अघि सारेर जनआस्था जित्नुपर्ने आवश्यकता छ। गगन र विश्वले यो अभिभारा बुझेर पार्टी र जनताबीचको सेतुको रूपमा काम गर्नुपर्ने देखिन्छ। यो पुस्ताले ‘स्टन्ट’ राजनीति गर्नेहरूबाट मनोविज्ञान कब्जा गर्न लागेका जनताको भावना बुझ्नुपर्ने समय हो। पार्टीलाई मात्र होइन, देशलाई सही दिशामा लैजाने क्षमता युवा पुस्तामा भएको जनताको विश्वासलाई व्यवहारमा बदल्न गगन-विश्वले रणनीतिक कदम चाल्नुपर्छ।
तर, पुराना नेताहरूको प्रभावले युवा पुस्ताको जोसलाई दबाउने प्रयास गरेमा कांग्रेस मात्र होइन, मुलुककै राजनीतिक प्रणालीले ठूलो क्षति व्यहोर्नुपर्ने सम्भावना छ। गगन-विश्वको नेतृत्वलाई बलियो बनाउन कांग्रेसभित्रको आन्तरिक सञ्जाल, युवा शक्तिको परिचालन, र जनताको मर्म बुझ्ने क्षमता नै निर्णायक हुनेछ।
सामाजिक परिवर्तनको अभियानमा अग्रणी कांग्रेसको यो पुस्ताले परिवर्तनको वेगलाई समात्न सकेन भने देश फेरि ‘स्टन्ट’ गर्नेहरूको हातमा पुग्नेछ। यसले मुलुकलाई असफल राष्ट्रको दिशामा लैजान सक्छ। त्यसैले युवा नेतृत्वले पार्टी र देशलाई अघि बढाउन आत्मविश्वास र संकल्पको नमूना प्रस्तुत गर्नुपर्छ। अहिलेको समय गगन-विश्व पुस्ताले आफ्नो नेतृत्व क्षमतालाई प्रमाणित गर्ने अवसर र चुनौती दुवै हो।
