पोखरा, २३ मंसिर । सहकारी ठगी, संगठित अपराध र सम्पत्ति शुद्धीकरणको आरोपमा पक्राउ परेका रवि लामिछानेलाई कास्की जिल्ला अदालतले चार दिनको म्याद थप गरेको छ। काठमाडौँ र चितवनमा बयान गराएर शुक्रबार राति पोखरा ल्याइएका लामिछानेलाई आइतबार कास्की जिल्ला अदालतमा उपस्थित गराइएको थियो। प्रहरीको तर्फबाट १३ दिनको म्याद थपको माग गरिएको भए पनि न्यायाधीश हिमलाल बेल्वासेको इजलासले चार दिनको समय दिएको हो।
अदालतमा रविसँगै पूर्व डिआइजी र गोर्खा मिडियाका पूर्व उपाध्यक्ष छविलाल जोशी र पक्राउ परेकी लिला पछाइलगायतले आफ्ना धारणा राखेका थिए। रविका कानुन व्यवसायीहरूले उनलाई अनुचित रूपमा पक्राउ गरिएको भन्दै न्यायाधीशको ध्यानाकर्षण गराए। रविले आफूलाई राजनीतिक प्रतिशोधका आधारमा थुनामा राखिएको दाबी गरे।
इजलासमा रविले प्रहरीको रवैया र आफ्नो स्वास्थ्य अवस्थाबारे गुनासो गरेका थिए। उनले हिरासतमा औषधि खानसमेत नपाएको, बिरामी भएको अवस्थामा रातारात पोखरा ल्याइएको र प्रहरीले अभद्र व्यवहार गरेको दाबी गरे। रविले भने, “माथिको आदेश भन्दै राति ११/१२ बजे केही प्रहरीले मादक पदार्थ सेवन गरेर मलाई जबर्जस्ती गाडीमा राखेर पोखरा ल्याए।”
उनले आफूलाई चितवनमा ८-९ घण्टा बयान दिएको भए पनि स्वास्थ्यमा समस्या भएका कारण आराम गर्न आग्रह गरेको बताए। पोखरा ल्याइएपछि आफ्नो स्वास्थ्यमा समस्या देखिएको र अस्पताल जाँदा प्रेसर बढेको प्रमाण अदालतलाई प्रस्तुत गरेको उनले जनाए।
रविले सहकारी ठगीमा आफ्नो कुनै संलग्नता नरहेको र अरूले गरेको गल्तीको भागीदार बनाइएको आरोप लगाए। “मलाई सिध्याउनकै लागि दुःख दिने र देशभर डुलाउने काम भइरहेको छ,” उनले भने।
पूर्व डिआइजी छविलाल जोशीले सरकारको असक्षमता र रविलाई थुनामा राखेर अन्य पीडितका समस्या समाधान नगरेको भन्दै आलोचना गरे। लिला पछाइले आफू जिबी राईसँगको व्यक्तिगत सम्बन्धका कारण थुनामा परेको गुनासो गरिन्। सहकारी ठगी प्रकरणमा मुख्य अभियुक्त जिबी राई फरार छन्।
अदालतमा सहकारी पीडितका कानुन व्यवसायीहरूले रविलाई हिरासतमा राखेर छानबिन गर्नुपर्ने तर्क गरे। सहकारी पीडित कृष्ण जैसीले रविको गृहमन्त्रीकालमा आफूहरूको निवेदनसमेत प्रहरीले नलिएको भन्दै उनको हिरासत अवधि थपिनुपर्ने माग गरे। सरकारी वकिल कार्यालयका प्रतिनिधिहरूले नयाँ प्रमाण आउने क्रम जारी रहेकाले अनुसन्धानका लागि म्याद थप्न आग्रह गरेका थिए।
रविलाई सहकारी ठगी, संगठित अपराध र सम्पत्ति शुद्धीकरण मुद्दामा पक्राउ गरी विभिन्न जिल्लामा बयान गराइएको छ। संसदीय समितिको प्रतिवेदनले रविको गोर्खा मिडिया नेटवर्कमा विभिन्न सहकारीका रकम लगेर अपचलन भएको दाबी गरेको छ। रविसहित छविलाल जोशी र कुमार रम्तेलमाथि पनि अनुसन्धान भइरहेको छ।
अनलाइनखबरका अनुसार, पोखराको सूर्यदर्शन सहकारीबाट मात्र झन्डै ५ करोड ५८ लाख रुपैयाँ गोर्खा मिडियामा गएको देखिएको छ। देशभरका सहकारीबाट करिब ६५ करोड रुपैयाँ अपचलन भएको समितिको प्रतिवेदनले देखाएको छ। मुख्य अभियुक्त जिबी राई अझै फरार रहेका छन् भने कुमार रम्तेल पुर्पक्षका लागि कास्की कारागारमा छन्।
रविलाई बयानका लागि अब वीरगञ्ज पनि लगिने छ। घटनाले सहकारी व्यवस्थापनमा रहेका गम्भीर त्रुटी र नियमन प्रणालीप्रतिको सवाललाई सतहमा ल्याएको छ।
