पोखरा, २७ मंसिर। कन्जरभेटिभ पार्टीकी नेतृ केमी बाडेनोकले नाइजेरियाबारे आफ्ना विगतका टिप्पणीलाई बचाउ गरेकी छन्। नाइजेरियाका उपराष्ट्रपति काशिम सेटिमाले बाडेनोकले आफ्नो “मूल राष्ट्र”प्रति सम्मान नदेखाएको आरोप लगाएपछि यो विषय चर्चामा आएको हो।
बिबिसीका अनुसार, बाडेनोक, जो बेलायतमा जन्मिएकी भए पनि अधिकांश समय नाइजेरियामा बिताएकी थिइन्,ले नाइजेरियामा आफ्नो बाल्यकाल भय र असुरक्षामा बितेको र देश व्यापक भ्रष्टाचारले ग्रस्त रहेको टिप्पणी गरेकी थिइन्।
सोमबार, अबुजामा आप्रवासनबारेको सम्बोधनमा, उपराष्ट्रपति सेटिमाले बाडेनोकलाई “आफ्नो नामबाट केमी हटाउन सक्ने” बताएका थिए। उनले भने, “उनी आफ्ना विचार राख्न स्वतन्त्र छिन्। तर यो तथ्यलाई परिवर्तन गर्न सक्दैन कि संसारकै महान् कालो राष्ट्र नाइजेरिया हो।”
यसबारे प्रश्न गर्दा बाडेनोकका प्रवक्ताले भने, “उनी आफ्ना भनाइमा दृढ छिन्। उनी नाइजेरियाकी पीआर (प्रचारकर्ता) होइनन्। उनी विपक्षी दलको नेत्री हुन् र यस भूमिकाप्रति गर्व गर्छिन्। उनले सत्य बोल्छिन् र आफ्नो विचार स्पष्ट राख्छिन्।”
बाडेनोकको टिप्पणीले नाइजेरियाका केही उच्च तहका व्यक्तित्वहरूको आलोचना खेप्दै आएको छ। उपराष्ट्रपति सेटिमाले बाडेनोकको तुलना बेलायतका पूर्वप्रधानमन्त्री ऋषि सुनकसँग गरेका थिए। उनले सुनकलाई “उज्यालो र प्रतिभाशाली युवा” भन्दै आफ्नो पुर्ख्यौली मुलुकप्रति सम्मान देखाएको उल्लेख गरे।
बाडेनोकको जीवनले उनको राजनीतिक विचारधारामा गहिरो प्रभाव पारेको छ। १९८० मा बेलायतको विम्बल्डनमा जन्मिएकी उनी बाल्यकालमा नाइजेरियाको लागोस र अमेरिकामा बसिन्। राजनीतिक अस्थिरता र आर्थिक संकटका कारण १६ वर्षको उमेरमा बेलायत फर्केर अध्ययन गरेकी थिइन्।
यस वर्षको कन्जरभेटिभ पार्टी सम्मेलनमा उनले लागोसको अवस्थालाई “जहाँ सबै कुरा विग्रेको जस्तो लाग्थ्यो” भन्दै आफ्ना अनुभवलाई चित्रण गरिन्। उनले नाइजेरियाको अस्थिरताले आफूलाई समाजवादको विपक्षमा उभ्याएको पनि बताएकी छन्।
बाडेनोकको टिप्पणीलाई लिएर विवाद भए पनि उनले आफ्ना भनाइप्रति अडान राख्दै नाइजेरियाको अवस्थाबारे खुलेर कुरा गर्ने संकेत गरेकी छन्।
