एजेन्सी। अमेरिकी न्याय विभागले प्रख्यात वेब ब्राउजर गुगल क्रोमलाई बिक्री गर्न दबाब दिने तयारी गरेको छ। ब्लुम्बर्गले उल्लेख गरेअनुसार, विभागले गुगलको मातृ कम्पनी अल्फाबेटलाई क्रोम ब्राउजर अलग गर्न आग्रह गर्न न्यायाधीशसँग औपचारिक अनुरोध गर्न सक्नेछ।
यो कदम एकाधिकारविरोधी नियम उल्लंघनका कारण गुगलविरुद्ध बढ्दो कानुनी कार्यवाहीको हिस्सा हो। अदालतले केही महिना अगाडि गुगललाई एकाधिकारको दुरुपयोग गरेको ठहर गर्दै दोषी ठहर गरेको थियो। अदालतले भनेको छ, “गुगलले आफ्नो एकाधिकार कायम राख्नका लागि गलत तरिकाले काम गरेको छ।” यस फैसलापछि न्याय विभागले गुगललाई आफ्नो क्रोम विभाग २० अर्ब डलरमा बेच्न वा अलग कम्पनीका रूपमा स्थापित गर्न प्रस्ताव गरेको छ।
गुगल क्रोम अहिले इन्टरनेट ब्राउजर बजारको ६५ प्रतिशत हिस्सा ओगटेको छ। यसको तुलनामा दोस्रो स्थानमा रहेको एप्पलको सफारीको हिस्सा २१ प्रतिशत छ। यदि न्यायाधीशले प्रस्तावलाई स्वीकृति दिएमा गुगललाई गम्भीर आर्थिक प्रभाव पर्न सक्ने आँकलन गरिएको छ।
यसका साथै, एन्ड्रोइड अपरेटिङ सिस्टमका सन्दर्भमा पनि न्याय विभागले थप कडा कदम चाल्ने सम्भावना छ। गुगललाई आफ्नो एन्ड्रोइड प्रणालीलाई अन्य सेवाबाट अलग गर्न बाध्य पार्न सकिन्छ। यसले भविष्यमा उपभोक्ताहरूलाई गुगलका सेवाहरू अलग्गै प्राप्त गर्ने वातावरण सिर्जना गर्न सक्नेछ।
गुगलले भने यो प्रस्तावप्रति आपत्ति जनाउँदै एक विज्ञप्तिमा जनाएको छ, “न्याय विभागको यो कार्य अतिवादी र कानुनी दायराभन्दा बाहिर छ। गुगल क्रोम उपभोक्ता र व्यवसायका लागि महत्त्वपूर्ण सम्पत्ति हो, यसको बिक्रीले ती सबैलाई नकारात्मक असर गर्नेछ।”
यो मुद्दा सन् २०२५ सम्मका लागि तन्किन सक्नेछ। ट्रम्प प्रशासनमा सुरु भएको यो कानुनी संघर्ष बाइडेन प्रशासनमा निर्णायक चरणमा पुगेको छ। ट्रम्पको पुनरागमनले यसमा उलटफेर ल्याउन सक्ने अनुमान गरिएको छ।
