काठमाडौं, २४ पुस । नेकपा (माओवादी केन्द्र) का अध्यक्ष पुष्पकमल दाहालले शान्ति प्रक्रियाका बाँकी काम टुङ्ग्याउन सडक आन्दोलन अपरिहार्य भएको बताएका छन्। बुधबार काठमाडौंमा आयोजित ‘शान्ति प्रक्रिया र बेपत्ता नागरिकहरूको सार्वजनिकीकरण’ सम्बन्धी कार्यक्रममा सम्बोधन गर्दै अध्यक्ष दाहालले कानुनीभन्दा राजनीतिक कारणले शान्ति प्रक्रियाका कामहरू रोकिएको बताए।
अध्यक्ष दाहालले अहिलेसम्मको परिस्थिति हेर्दा अन्ततः आन्दोलन नै आवश्यक पर्ने देखिएको बताए। “पुनः सडकमा दबाब सिर्जना नगरेसम्म शान्ति प्रक्रियाका बाँकी काम पूरा गर्न कठिन हुनेछ,” उनले भने। दाहालका अनुसार कतिपयले शान्ति प्रक्रियालाई व्यापारको रूपमा लिएको र कतिपयले माओवादीलाई तह लगाउने अस्त्रको रूपमा प्रयोग गरिरहेको आरोप पनि उनले लगाए।
उनले शान्ति प्रक्रियाका मुद्दाहरू १२ बुँदे समझदारी र विस्तृत शान्ति सम्झौतामा आधारित राजनीतिक सहमतिका दस्तावेज भएकाले समाधान पनि राजनीतिक सहमतिबाटै हुनुपर्ने बताए। “पीडितहरूले निरन्तर आवाज उठाउनु जरुरी छ, जरुरत परेको खण्डमा सडक आन्दोलनमा जानुपर्छ। अन्यथा, शान्ति प्रक्रियाका काम टुङ्ग्याउन अझै धेरै समय लाग्न सक्छ,” दाहालले थपे।
उनका अनुसार वर्तमान राजनीतिक नेतृत्व र राज्य संयन्त्रले समयमै सुधार नगरे बर्बादीतर्फ जाने खतरा बढ्न सक्छ। “सडक दबाबको माध्यमले मात्र राज्य र नेतृत्वलाई आफ्नो दायित्वबोध गराउन सकिन्छ,” उनले भने।
दाहालले अन्तरक्रिया र बहसले वातावरण बनाउन सहयोग गर्ने भए पनि शान्ति प्रक्रियाका बाँकी काम टुङ्ग्याउन पर्याप्त नहुने स्पष्ट पारे। उनले शान्ति प्रक्रियाका कामहरूमा ढिलाइले पीडित परिवारहरूको समस्या थप गहिरिएको भन्दै यथाशीघ्र समाधान गर्न सबै पक्षले गम्भीरता देखाउनुपर्नेमा जोड दिए।
