पोखरा, २५ पुस । कर्णाली डेभलपमेन्ट बैंकमा फर्जी निक्षेप प्रमाणपत्र पेस गरेको घटनापछि नेपाल राष्ट्र बैंकले विकास बैंक र फाइनान्स कम्पनीसमेत ६ संस्थाको तरलता अवस्थाबारे विस्तृत विश्लेषण सुरु गरेको छ। राष्ट्र बैंकले वाणिज्य बैंकहरूलाई ती संस्थाहरूले निक्षेप राखेको छ वा छैन भन्नेबारे सूचना माग गरेको छ।
कर्णाली डेभलपमेन्ट बैंकलाई राष्ट्र बैंकले समस्याग्रस्त घोषणा गर्दै यसको व्यवस्थापन जिम्मा लिएपछि अन्य संस्थाहरूको वित्तीय अवस्थाबारे पनि गहिरो अध्ययन गरिएको हो। कर्णाली बैंकका उच्च व्यवस्थापनका केही अधिकारीहरू संलग्न भएर नक्कली ‘ब्यालेन्स सर्टिफिकेट’ बनाएर रकम अपचलन गरेको आन्तरिक छानबिनबाट खुलेको थियो।
राष्ट्र बैंकका अनुसार, कर्णाली बैंकको खाता (सीआरआर) मा २२ करोड ७४ लाखभन्दा बढी मौज्दात रहेको भनिए पनि छानबिनले उक्त खातामा मौज्दात शून्य रहेको देखाएको छ। यस प्रकरणपछि चारवटा विकास बैंक र दुईवटा फाइनान्स कम्पनीको तरलता अवस्था विश्लेषण गर्न पत्राचार गरिएको छ।
छानबिनमा सप्तकोसी डेभलपमेन्ट बैंक, एक्सेल डेभलपमेन्ट बैंक, नारायणी विकास बैंक, सिन्धु विकास बैंक, जानकी फाइनान्स र पोखरा फाइनान्सको नाम समावेश छ। वाणिज्य बैंकहरूमा ती संस्थाहरूको निक्षेपको विवरण माग गरिएको हो।
राष्ट्र बैंकका सहायक प्रवक्ता डा. डिल्लीराम पोख्रेलले यो नियमित प्रक्रिया अन्तर्गत गरिएको बताउँदै तरलता अवस्था कस्तो छ भनेर बुझ्न मात्र विवरण मागिएको स्पष्ट पारे। राष्ट्र बैंकले तरलता अवस्था सामान्य भए बैंकहरूकै व्यवस्थापनमार्फत सुधार गर्न पहल गर्ने नीति लिएको छ।
विकास बैंक र फाइनान्स कम्पनीहरूमा समस्या बढ्दै गएकाले राष्ट्र बैंकले यसअघि पनि यस्ता संस्थाहरूलाई समस्याग्रस्त घोषणा गर्दै व्यवस्थापनको जिम्मा लिएको थियो। कर्णाली बैंक प्रकरणले अन्य संस्थाहरूमा पनि वित्तीय निगरानीको आवश्यकता औँल्याएको छ।
