पोखरा, २६ पुस – अमेरिकी उद्यमी एलन मस्कले बेलायतका पूर्वप्रधानमन्त्री गोर्डन ब्राउनलाई लक्षित गर्दै सामाजिक सञ्जालमा गरेका आरोपहरू विवादित बनेका छन्। बिबिसीका अनुसार यी आरोपहरू एक दशकभन्दा पुरानो गृहमन्त्रालयको सर्कुलरको झुटो दाबीमा आधारित रहेको पुष्टि भएको छ।
एलन मस्कले हालै आफ्नो प्लेटफर्म एक्स (पहिले ट्विटर) मा पोस्ट गर्दै गोर्डन ब्राउनमाथि बालबालिका यौन शोषण प्रकरणमा उदासीनता देखाएको आरोप लगाएका थिए। उनका अनुसार २००८ मा जारी गरिएको एउटा गृहमन्त्रालय सर्कुलरले पीडित बालबालिकाहरूले आफ्नो “यौन व्यवहारको बारेमा सूचित निर्णय” गरेको भन्दै प्रहरीलाई हस्तक्षेप नगर्न सल्लाह दिएको थियो। तर बिबिसी भेरिफाईले यस विषयमा गरेको विस्तृत अनुसन्धानले यस्तो सर्कुलर कहिल्यै जारी नगरिएको पत्ता लगाएको छ।
गृहमन्त्रालयका सर्कुलरहरूको विस्तृत खोज गर्दा यस्ता शब्द प्रयोग भएको कुनै पनि दस्तावेज भेटिएन। यसबारे गोर्डन ब्राउनले “पुरै झुटो र कपोलकल्पित” भन्दै प्रतिक्रिया दिएका छन्। गृहमन्त्रालयका अनुसार “ग्याङ समूहलाई मुद्दा नचलाउन” वा “पीडित बालिकाहरूलाई दोष दिने” कुनै निर्देशन कहिल्यै जारी गरिएको थिएन।
विवादको सुरुवात
यो विवाद २०१८ मा सुरु भएको थियो जब उत्तर पश्चिम इङ्ल्यान्डका पूर्व क्राउन अभियोजन सेवा प्रमुख नजीर अफजलले बिबिसी रेडियो ४ मा दिएको अन्तर्वार्तामा गृहमन्त्रालयले प्रहरीलाई यस्तो सल्लाह दिएको भन्दै दाबी गरे। उनले प्रहरी अधिकारीहरूले गृहमन्त्रालयको निर्देशिकालाई गलत अर्थ लगाएको हुनसक्ने बताएका थिए। यद्यपि, उनले स्वयंले पनि यस्तो सर्कुलर देखेको प्रमाण दिन सकेका छैनन्।
बिबिसी भेरिफाईले उक्त समयका सबै सर्कुलरहरूको अनुसन्धान गर्दा बाल यौन शोषणसँग सम्बन्धित कुनै सर्कुलरमा “सूचित निर्णय” भन्ने शब्द नपाएको जनाएको छ। अफजलले भनेका शब्दहरू कुनै पनि आधिकारिक दस्तावेजमा भेटिएका छैनन्।
मस्कका पोस्टहरूमा भ्रामक तथ्य
सामाजिक सञ्जाल एक्समा एलन मस्कले यस्ता पोस्टहरूलाई प्रवर्द्धन गर्दा झन् ठूलो चर्चा भएको हो। मस्कले गोर्डन ब्राउनलाई “ब्रिटिश जनताका लागि अक्षम्य अपराध” गरेको आरोप लगाएका थिए। उनले क्याम्पेनर म्यागी ओलिभरको एक भिडियो पनि साझा गरेका थिए जसमा उनले “ब्राउनले यस्तो सर्कुलर पठाएको” दाबी गरेकी थिइन्।
तर बिबिसीले ओलिभरसँग सम्पर्क गर्दा उनले आफ्नो दाबी अफजलका भनाइमा आधारित रहेको स्वीकारेकी छिन्। नजीर अफजलले भने यसबारेमा पछिल्लो समय प्रतिक्रिया दिँदै “उनका भनाइलाई गलत व्याख्या गरिएको” बताएका छन्।
गृहमन्त्रालयको भनाइ
गृहमन्त्रालयले यस विषयमा स्पष्ट गर्दै भनेको छ, “यस्ता सर्कुलरको कुनै आधार छैन। गृहमन्त्रालयले बाल यौन शोषणका ग्याङहरूलाई मुद्दा नचलाउन भन्ने कुनै निर्देशन दिएको छैन।” त्यस्तै, २००८ की गृहमन्त्री ज्याकी स्मिथले पनि यस्ता आरोपलाई “पूर्णरूपमा गलत” भनेकी छिन्।
बिबिसी भेरिफाईले यस विषयमा सबै सम्बद्ध दस्तावेजहरूको समीक्षा गर्दा कतै पनि यस्ता शब्दावली भेटिएका छैनन्। बालबालिका संरक्षणसम्बन्धी सर्कुलरमा स्पष्ट रूपमा यौन शोषणबाट बालबालिकालाई बचाउन कदम चाल्नुपर्ने उल्लेख छ।
गोर्डन ब्राउनको प्रतिक्रिया
गोर्डन ब्राउनका प्रवक्ताले एलन मस्कका आरोपलाई “पूणरूपमा झुटा र आधारहीन” भनेका छन्। “गोर्डन ब्राउनले यस्ता कुनै सर्कुलरलाई स्वीकृति दिएका थिएनन्, न त यसमा कुनै सहभागिता जनाएका थिए,” प्रवक्ताले बताए।
सामाजिक सञ्जालमा फैलिएको गलत सूचना
मस्कद्वारा प्रवर्द्धन गरिएका पोस्टहरूले सामाजिक सञ्जालमा व्यापक ध्यान आकर्षित गरेका छन्। तर यस्ता झुटा दाबीहरूले बालबालिका शोषण जस्ता गम्भीर विषयमाथि गलत सूचना फैलाउने काम गरेको विज्ञहरूले बताएका छन्।
विशेषज्ञहरूले सही सूचना र तथ्यको आधारमा यस्ता गम्भीर मुद्दामा छलफल गर्नुपर्नेमा जोड दिएका छन्। बिबिसी भेरिफाईले गृहमन्त्रालयका सर्कुलरको विश्लेषण गरेर यस्ता गलत दाबीहरू खण्डन गरेको हो।
