पोखरा, १६ फागुन। आजदेखि नेपाल मजदुर किसान पार्टी (नेमकिपा)को आठौँ महाधिवेशन भक्तपुरमा शुरु भएको छ। यो महाधिवेशन फागनु १९ गतेसम्म चल्नेछ। महाधिवेशनका बारेमा जानकारी दिँदै नेमकिपाका केन्द्रीय सदस्य सरोजराज गोसाईँले पार्टीले विभिन्न आन्तरिक र बाह्य विषयमा छलफल गर्दै महत्वपूर्ण एजेण्डा पारित गर्ने बताए।
महाधिवेशनमा काठमाडौँ, भक्तपुर, ललितपुरसहित सातै प्रदेशका प्रतिनिधि, पर्यवेक्षक र कार्यकर्ताको सहभागिता रहने जानकारी दिइएको छ। यसका साथै, महाधिवेशनको उद्घाटन कार्यक्रमका लागि भक्तपुरका विभिन्न स्थानहरूमा सांस्कृतिक कार्यक्रम र बाजागाजा प्रदर्शन गरिएको छ। बिहान १० बजे कमलविनायक, मध्यपुरथिमिको बोडे, सूर्यविनायक लगायतका स्थानहरूबाट जुलुस र सांस्कृतिक कार्यक्रमहरूको शुरुवात भएको हो। दिउँसो १ बजे सल्लाघारीमा पुगेर महाधिवेशनको उद्घाटन सत्र सम्पन्न हुनेछ।
नेमकिपाको इतिहासमा महाधिवेशनको पहिलो कार्य २०३१ सालमा भएको थियो, जसको नेतृत्व पार्टीका संस्थापक अध्यक्ष नारायणमान बिजुक्छेँले गरेका थिए। त्यसयता सातवटा महाधिवेशन सम्पन्न भइसकेका छन्। पछिल्लो महाधिवेशनमा बिजुक्छेँको अध्यक्षतामा २५ सदस्यीय केन्द्रीय समिति चयन गरिएको थियो। यस वर्षको महाधिवेशनमा पार्टीले आफ्नो नेतृत्वलाई फेरि चयन गर्ने कि नयाँ नेतृत्व ल्याउने भन्ने विषयमा चासो उत्पन्न भएको छ।
