पोखरा, २२ चैत्र। शिक्षा ऐन जारीको माग गर्दै काठमाडौंमा आन्दोलनरत शिक्षक महासंघले सरकारको वार्ता प्रस्ताव अस्वीकार गरेको छ। कार्यवाहक प्रधानमन्त्री प्रकाशमान सिंहको अध्यक्षतामा आज सिंहदरबारमा दिउँसो ३ बजेका लागि तय गरिएको वार्ता बैठकमा सहभागी नहुने निर्णय महासंघले सार्वजनिक रूपमा जनाएको हो।
महासंघको आन्दोलन परिचालन समिति संयोजक एवं सहअध्यक्ष नानुमाया पराजुलीले वार्ता होइन, शिक्षा ऐन चाहिएको स्पष्ट पार्दै आफूहरू आन्दोलनको मैदानमै रहने अडान व्यक्त गरिन्। “हामी सिंहदरबार जाँदैनौं, वार्तामा होइन, ऐनमा हाम्रो चासो छ,” पराजुलीको भनाइ छ।
यसअघि बिहीबार कार्यवाहक प्रधानमन्त्री सिंहको अध्यक्षतामा सरोकारवाला सरकारी पक्षबीच छलफल भएको थियो। सोही छलफलपछि सरकारले शिक्षक महासंघलाई वार्ताका लागि आमन्त्रण गरेको थियो। आजको प्रस्तावित वार्तामा गृहमन्त्री, मुख्य सचेतक, र प्रमुख सचेतकको समेत सहभागिता हुने तय भएको थियो। यद्यपि महासंघ सहभागी नहुनुले वार्ताको औचित्यमाथि प्रश्न उठेको छ।
गत २०८० असोजमा सरकारले शिक्षक महासंघसँग गरेको सहमति कार्यान्वयन नगरेको भन्दै शिक्षकहरू २० चैतदेखि काठमाडौंमा प्रदर्शनमा उत्रिएका छन्। उनीहरूले शिक्षा ऐन जारी नभएसम्म आन्दोलन नरोकिने चेतावनी दिएका छन्।
महासंघको दाबी छ– सरकारले पटकपटक आश्वासन दिँदै धोका दिएको छ, अब भने अन्तिम लडाइँको मोर्चा बनेको छ र सहमतिमा होइन, ऐन जारी नभएसम्म कुनै पनि वार्ता स्वीकार्य नहुनेछ।
