पोखरा, १० वैशाख। प्रधानमन्त्री एवं नेकपा एमालेका अध्यक्ष केपी शर्मा ओलीले नेपाली कांग्रेसका सभापति शेरबहादुर देउवाको बैंकक भ्रमणलाई लिएर भइरहेको राजनीतिक आशंकालाई आधारहीन र हावादारी बताएका छन्। नेपाल कम्युनिस्ट पार्टीको ७६ औं स्थापना दिवसको अवसरमा काठमाडौंमा आयोजित कार्यक्रममा ओलीले कांग्रेस–एमालेको सहकार्यविरुद्ध षड्यन्त्र गर्न देउवा बैंकक गएको भन्ने सोच हास्यास्पद भएको बताए।
ओलीले देउवा स्वास्थ्य परीक्षणका लागि पत्नी आरजु देउवासहित बैंकक गएका स्पष्ट पारे। उनले देउवाको भ्रमणलाई अनावश्यक राजनीतिक रंग दिन खोजिएको भन्दै आपत्ति जनाए। साथै, परराष्ट्रमन्त्री आरजुको कार्यक्रम पनि त्यही रहेको जानकारी दिए।
ओलीले कांग्रेससँगको सहमतिअनुसार १५ महिनापछि प्रधानमन्त्री पद देउवालाई हस्तान्तरण गरिने पनि दोहोर्याए। उनले देशमा कुनै पनि प्रतिगमन नहुने दाबी गर्दै देउवा फर्किएपछि राजनीतिक परिवर्तन हुने हल्लालाई अस्वीकार गरे। ‘कसैले चाहेर पनि प्रतिगमन सम्भव छैन,’ उनले भने।
