पोखरा, ११ वैशाख। सत्तारूढ गठबन्धनभित्र अविश्वासको घेरो तन्कँदै जाँदा नेपाली कांग्रेस सभापति शेरबहादुर देउवाको बैंकक यात्रा थप चर्चा र शंकाको घेरामा परेको छ। अघिल्लो साता देउवा निवासमा बसेको कांग्रेस पदाधिकारी बैठकमा महामन्त्री विश्वप्रकाश शर्माले यात्रा सम्बन्धी प्रश्न उठाएपछि शुरू भएको विवादले पार्टीभित्रै गहिरो अविश्वास झल्किएको छ।
सभापति देउवाले बैंकक यात्रालाई स्वास्थ्य परीक्षणका लागि सामान्य फलोअपको रूपमा व्याख्या गरे पनि महामन्त्री शर्माले त्यसमा आशंका जनाए। शर्माले देउवाले अघिल्लो पटक सिंगापुरमा उपचार गरिसकेपछि फलोअप बैंककमा किन भन्ने प्रश्न उठाउँदै यात्रा ‘सामान्य’ नभएको संकेत गरे। बैठकमा सहभागी नेताहरूका अनुसार उक्त संवादले सरकारको स्थायित्वमा प्रश्न खडा भएको अनुभूति भएको थियो।
यता, कांग्रेस–एमालेबीचको सहकार्यमा बनेको करिब दुई तिहाइ बहुमतको सरकार पनि दरारको सिकार बन्दै गएको देखिएको छ। संविधान संशोधनजस्ता मुख्य एजेन्डा थाती रहँदा सरकारले निर्णयभन्दा नियुक्तिमा बढी केन्द्रित भएको कांग्रेसको आरोप छ। कुलमान घिसिङ हटाइएपछि ऊर्जा राज्यमन्त्री पूर्णबहादुर तामाङको बर्खास्ती, शिक्षामन्त्रीको राजीनामा र शिक्षक आन्दोलनजस्ता घटनाले सरकार असहज परिस्थितिमा फसेको छ।
बीआरआई फ्रेमवर्कमा हस्ताक्षर गरेपछि भारत र पश्चिमाको चासो बढेको कांग्रेसको बुझाइ छ भने माओवादी केन्द्र सरकार परिवर्तनको openly तयारी गरिरहेको देखिन्छ। कांग्रेस नेतृत्वमा प्रधानमन्त्रीको विकल्प खोज्ने माओवादीको तयारीबीच देउवा दुवै पार्टीसँगको सम्बन्ध सन्तुलनमा राख्न प्रयासरत देखिन्छन्।
एमालेभित्रै पनि प्रधानमन्त्री ओलीको निर्णयप्रति असन्तुष्टि बढ्दो छ। चीनसँगको सम्बन्ध, शिक्षक आन्दोलन र भारतसँगको दूरीले सरकारलाई चौतर्फी दबाबमा पारेको छ। यस्तै समयमा देउवाको विदेश यात्रा र कांग्रेसभित्रको रणनीतिक असमझदारीले सरकारको आयुबारे गम्भीर प्रश्न उठेको छ।
