पोखरा, ९ फागुन। पोखरा भ्रमण वर्ष २०८० को उद्घाटन समारोहमा हाइड्रोजन ग्यास भरिएको बेलुन विस्फोट भएपछि पक्राउ परेका भारतीय नागरिक कमलेश कुमारलाई जिल्ला प्रशासन कार्यालय कास्कीले बिहीबार रिहा गर्ने आदेश दिएको छ।
फागुन ३ गते आयोजित उद्घाटन कार्यक्रममा भएको विस्फोटका कारण उपप्रधानमन्त्री तथा अर्थमन्त्री विष्णु पौडेल र पोखरा महानगरपालिकाका मेयर धनराज आचार्य घाइते भएका थिए। विस्फोटपछि मेयर आचार्यको गाला र देब्रे हातमा गहिरो जलन भएको छ भने मन्त्री पौडेलको दुवै हात र अनुहारमा घाउ लागेको थियो। उनीहरूलाई प्रारम्भिक उपचारपछि हेलिकोप्टरमार्फत काठमाडौंको कीर्तिपुर अस्पताल लगिएको थियो।
कमलेश कुमारलाई फागुन ६ गते पक्राउ गरिएको थियो। अनुसन्धानका क्रममा उनले बिना कुनै आधिकारिक अनुमति हाइड्रोजन ग्यास उत्पादन गरी बेलुनमा भरेको खुलासा भएको छ। उनलाई अभद्र व्यवहारसम्बन्धी कसुरमा हिरासतमा राखिएको थियो।
