पोखरा, १८ माघ । तनहुँको बेलचौतारा–मुस्ताङ जोड्ने पुल निर्माणमा ढिलाइ भएपछि स्थानीयवासी असन्तुष्ट बनेका छन्। चार वर्षअघि सुरु गरिएको परियोजनाले अहिलेसम्म केवल ३० प्रतिशत मात्र भौतिक प्रगति हासिल गरेको छ।
१५ करोड ५९ लाख रुपैयाँ लागतमा निर्माण सम्पन्न गर्ने लक्ष्य लिएको उक्त पुल निर्माणमा ढिलाइ हुनुले स्थानीयलाई चिन्तित बनाएको छ। निर्माण कम्पनीले कोभिड महामारीका कारण आर्थिक संकट सामना गर्नुपरेको बताउँदै निर्धारित समयमै काम सम्पन्न गर्न नसकेको दाबी गरेको छ।
पूर्वाधार विकास कार्यालयका प्रमुख रवीन्द्र तिवारीका अनुसार हालसम्म पुल निर्माणका लागि कम्पनीलाई आठ करोड १३ लाख रुपैयाँ भुक्तानी भइसकेको छ। कुल १५०.४ मिटर लम्बाइको पुल चार स्पानमा बन्ने योजना थियो, तर हालसम्म एउटा मात्र स्पान निर्माण भएको छ।
स्थानीय बासिन्दाहरूको भनाइमा निर्माण कार्य सुस्त हुँदा आवागमनमा समस्या भई दैनिक जीवनयापन प्रभावित भएको छ। उनीहरूले सम्बन्धित निकायलाई काम छिटो सक्न दबाब दिन माग गरेका छन्।
