नेदरल्यान्ड्सको द हेगस्थित टारवेकेम्प क्षेत्रमा शनिबार बिहान भएको विस्फोटबाट कम्तीमा पाँचजनाको मृत्यु भएको छ भने चार जना घाइते भएका छन्। स्थानीय समयअनुसार बिहान ६:१५ (०५:१५ GMT) मा भएको विस्फोटले तीनतले आवासीय भवनका केही भाग ध्वस्त बनाएको छ।
द हेगका मेयर जान भान जानेनले अझै कति मानिस भग्नावशेषमा फसेका छन् भन्ने स्पष्ट नभएको बताएका छन्। उनले बाँकी जीवित व्यक्तिहरूलाई उद्धार गर्न सक्ने सम्भावना न्यून रहेको र समुदायलाई “सबैभन्दा खराब अवस्था” का लागि तयार रहन आग्रह गरेका छन्।
विस्फोटको कारण अझै स्पष्ट भएको छैन। यद्यपि, डच प्रहरीले विस्फोटपछि “धेरै तीव्र गतिमा” एउटा कार भागेको उल्लेख गर्दै घटनाबारे साक्षीहरूको खोजी गरिरहेको छ।
डच अग्नि सेवा टोलीले पाँच जनाको मृत्यु पुष्टि गरेको छ। त्यस्तै, डच सञ्चारमाध्यमका अनुसार विस्फोटबाट पाँच वटा फ्ल्याट पूर्ण रूपमा ध्वस्त भएका छन्।
उद्धार टोलीले खोजी कुकुरसहित भग्नावशेषमा काम गरिरहेको छ। केही क्षेत्र अत्यन्त खतरनाक भएका कारण उद्धार कार्यमा कठिनाइ भइरहेको छ। ठूलो खाल्डो उत्खनन मेसिनमार्फत भग्नावशेष हटाउने काम भइरहेको छ भने घटनास्थलमा प्रकाशको व्यवस्था पनि गरिएको छ।
१४ वर्षीय स्थानीय बालक एडम मुलरले उक्त विस्फोटलाई “भूकम्पजस्तै महसुस” भएको बताए। “म सुतिरहेको थिएँ, अचानक ठूलो आवाज आयो। झ्यालबाट हेर्दा आगोको ज्वाला मात्र देखियो,” उनले एएफपीलाई भने।
डच राष्ट्रिय प्रहरी आयुक्त जेनी नोलले समुदायमा “अविश्वास र अनिश्चितता” छाएको जनाएका छन्।
डच राजा विलेम-अलेक्जान्डर र रानी म्याक्सिमाले पनि एक वक्तव्य जारी गर्दै घटना प्रभावितहरूप्रति सहानुभूति व्यक्त गरेका छन्। “हामी यस घटनाबाट प्रभावित सबैप्रति सहानुभूति व्यक्त गर्छौं र हराइरहेका आफ्ना प्रियजनहरूको अवस्थाबारे चिन्तित सबैसँग हाम्रो सोच छ,” वक्तव्यमा भनिएको छ।
(स्रोत: बिबिसी)
