पोखरा, पुस २३ । समाचार एजेन्सी बिबिसीका अनुसार हमासले इजरायलमा गरेको आक्रमणका क्रममा बन्दी बनाएकामध्ये ३४ जनालाई रिहा गर्ने भएको छ। हमासका एक उच्च अधिकारीले सञ्चारमाध्यममार्फत ३४ जनाको सूची सार्वजनिक गर्दै इजरायलसँगको सम्भावित युद्धविराम सम्झौताको पहिलो चरण अन्तर्गत उनीहरूलाई रिहा गर्न लागिएको जानकारी दिएका हुन्।
सार्वजनिक गरिएको सूची अनुसार, रिहा गरिनेहरूमा ५० देखि ८५ वर्ष उमेर समूहका १० जना महिला र ११ जना वृद्ध पुरुष रहेका छन्। यसका साथै साना बालबालिका र बिरामी व्यक्तिहरूलाई पनि प्राथमिकतामा राखेर रिहा गरिने सूचीमा समावेश गरिएको बताइएको छ। यद्यपि, इजरायली प्रधानमन्त्री कार्यालयले भने हमासद्वारा रिहा गरिने भनिएका व्यक्तिहरूको बारेमा आफूलाई कुनै आधिकारिक जानकारी नभएको जनाएको छ।
हमासको बन्धकमा नेपाली नागरिक विपिन जोशी पनि रहेको अनुमान गरिएको छ, तर उनको अवस्थाबारे अहिलेसम्म कुनै स्पष्ट जानकारी सार्वजनिक गरिएको छैन। यसले गर्दा नेपाली समुदायमा थप चिन्ता छाएको छ।
हमासले सन् २०२३ को अक्टोबर महिनामा इजरायलमा आक्रमण गर्दा २५१ जनालाई बन्धक बनाएको थियो। सो आक्रमणमा १ हजार २ सय जनाको ज्यान गएको थियो। त्यसयता इजरायलले हमाससँग सम्बन्धित प्यालेस्टिनी नागरिकमाथि निरन्तर प्रत्याक्रमण गर्दै आएको छ। दुवै पक्षबीचको यो द्वन्द्वले ठुलो मानवीय क्षति पुर्याएको छ। बन्दी रिहाइको यो कदमले केही हदसम्म भए पनि शान्तिको आशा जगाएको छ।
