जनकपुरधाम, १५ माघ । मधेस प्रदेश सरकारले चालु आर्थिक वर्षमा अपेक्षाकृत न्यून मात्रामा बजेट खर्च गरेको छ। लेखा नियन्त्रकको कार्यालयका अनुसार पुस मसान्तसम्ममा प्रदेश सरकारले कुल बजेटको पाँच दशमलव ८३ प्रतिशत मात्रै खर्च गर्न सकेको हो। यो रकम दुई अर्ब ४४ करोड ६० लाख रुपैयाँ बराबरको छ।
यस वर्षको कुल बजेट विनियोजन ४१ अर्ब ९३ करोड ३८ लाख २० हजार रहेको छ, जसमा पुँजीगत खर्चको हिस्सा एक दशमलव ३३ प्रतिशत र चालु खर्चको हिस्सा १३ दशमलव ५३ प्रतिशत रहेको छ। बजेट खर्चका आधारमा विभिन्न मन्त्रालयहरूको विवरण पनि सार्वजनिक गरिएको छ।
मुख्यमन्त्री कार्यालयले ४ करोड ७५ लाख खर्च गरेको छ भने अर्थ मन्त्रालयको खर्च ४ करोड पाँच लाख, वाणिज्य र पर्यटन मन्त्रालयको खर्च ७ करोड ९९ लाख, र भूमि व्यवस्था तथा कृषि मन्त्रालयको खर्च १५ करोड ५२ लाख पुगेको छ। यसै गरी ऊर्जा, सिँचाइ र खानेपानी मन्त्रालयको २८ करोड ८६ लाख, गृह मन्त्रालयको ३ करोड ४८ लाख र वन तथा वातावरण मन्त्रालयको ३८ करोड ३ लाख खर्च भएको छ।
विगतमा राजनीतिक अस्थिरता र बजेट निकासा नहुँदा खर्चमा समस्या आएको कुरा जनाइएको छ। जसपा नेपालका सचेतक रामअशिष यादवले सरकारको कमीकमजोरीका कारण बजेट खर्चमा समस्या आएको बताए। प्रदेश सरकारले बजेट खर्चका लागि संकल्प प्रस्ताव पारित गरेको जानकारी पनि दिइएको छ।
