पोखरा, १ फागुन । तत्कालीन नेकपा माओवादीको उद्गमस्थल मानिने रूकुम (पश्चिम)मा फागुन १ गते ‘जनयुद्ध’ दिवस मनाउने निर्णयलाई लिएर विवाद उत्पन्न भएको छ। सत्तारुढ नेपाली कांग्रेस र प्रतिपक्षी माओवादी केन्द्रबीच मतभेद देखिएको छ।
सानीभेरी गाउँपालिका र बाँफिकोट गाउँपालिकाले कार्यपालिकाबाट निर्णय गर्दै ‘जनयुद्ध’ दिवस मनाउने घोषणा गरेपछि कांग्रेसले कडा आपत्ति जनाएको छ। सानीभेरी गाउँपालिकाको माघ ११ र बाँफिकोट गाउँपालिकाको माघ २७ गते बसेको कार्यपालिका बैठकले यो निर्णय गरेका थिए। विशेषगरी, बाँफिकोट गाउँपालिकाका अध्यक्ष जनककुमार बाँठामगर कांग्रेसबाट निर्वाचित भए पनि उनले ‘जनयुद्ध’ दिवस मनाउने निर्णय गरेपछि कांग्रेसभित्र नै असन्तुष्टि चुलिएको छ।
नेपाली कांग्रेस रूकुम (पश्चिम)का जिल्ला सभापति प्रेमप्रकाश ओलीले परिपत्र जारी गर्दै उक्त निर्णय उल्ट्याउन निर्देशन दिएका छन्। उनले फागुन १ गते सार्वजनिक बिदा नहुने स्पष्ट पार्दै, संविधान र कानुनविपरीत कुनै पनि गतिविधि नगर्न आग्रह गरेका छन्। सभापति ओलीले नेपालको संविधान र सर्वोच्च अदालतका आदेशहरूको हवाला दिँदै पालिकाहरूको निर्णय अवैधानिक रहेको दाबी गरेका छन्।
कांग्रेसले बाँफिकोटका मात्र नभई मुसिकोट, चौरजहारी, आठविसकोट र त्रिवेणी गाउँपालिकासहित विभिन्न पालिकाका वडा अध्यक्षहरूलाई समेत परिपत्र पठाएर ‘जनयुद्ध’ दिवस नमनाउन निर्देशन दिएको छ। संविधानको पालना गर्नुपर्ने बताउँदै, कांग्रेसले आफ्ना जनप्रतिनिधिहरूलाई स्पष्ट सन्देश दिएको छ।
यस विषयमा माओवादी केन्द्रले औपचारिक प्रतिक्रिया नदिए पनि सत्तारुढ दलभित्रैको विवाद चर्किने संकेत देखिएको छ। ‘जनयुद्ध’ दिवस मनाउने निर्णयलाई लिएर रूकुममा राजनीतिक ध्रुवीकरण बढ्न थालेको छ।
