३० कात्तिक, पोखरा। अभिनेता माओत्से गुरुङ अभिनित नयाँ फिल्म ‘अग्निदहन’ आगामी मंसिर ७ गतेबाट रिलिज हुँदैछ। यस फिल्ममा माओत्से धामीको चरित्रमा देखिँदैछन्। फिल्ममा निभाएको आफ्नो भूमिकाबारे कुरा गर्दै उनले यसलाई निभाउन विशेष कठिनाइ नपरेको बताएका छन्। माओत्सेका अनुसार, धामीको चरित्रलाई निकै सजिलोसँग प्रस्तुत गर्न सकेका छन्, किनकि उनले आफ्ना बाल्यकालमा धामी झाँक्री र बोक्सीका थुप्रै घटनाहरू देखेका थिए। उनले भने, “मैले देखेका तिनै धामीबाट क्यारेक्टर निकाले।”
माओत्से गुरुङका अनुसार, धामीको भूमिका निभाउनका लागि उनलाई खासै अनुसन्धान गर्न परेको छैन, किनकि घरमा सामान्य झारफुक पनि उनका बाबाले गरिरहन्थे। उनले यस भूमिकालाई निभाउन सजिलो महसुस गरे, विशेषगरी यसअघि उनी धामी झाँक्रीको पूजा र अनुष्ठान बच्चैदेखि देखिसकेका थिए।
फिल्मको ट्रेलरमा माओत्सेले महिलालाई फलामले डाम्ने र मलमुत्र खुवाउने जस्ता क्रूर कार्य गर्दै देखिन्छन्। यद्यपि, माओत्सेका अनुसार, उनी फिल्मको एक पात्र मात्र हुन् र यसमा उनले कुनै गम्भीर समस्याको सामना गरेका छैनन्। माओत्सेले आफ्नो अभिनयमा डर नलाग्ने कुरा पनि उल्लेख गरे, “म कलाकार हुँ, म प्रोटागोनिस्ट या एन्टागोनिस्ट मात्र भूमिका छैन भन्ने मनस्थितिमा अभिनय गर्छु।”
उनले फिल्ममा आफ्नो चरित्रलाई मनोवैज्ञानिक दृष्टिकोणबाट पनि प्रस्तुत गरेको बताए। माओत्सेका अनुसार, ‘बोक्सी’को आरोप लागेका महिलाप्रति सबै धामी क्रूर हुँदैनन्। कतिपय धामीहरूले महिलाको मनोवैज्ञानिक उपचार पनि गरेको माओत्सेले बताएका छन्, तर बोक्सीको नाममा महिलालाई दुख दिइरहेका व्यक्तिहरूलाई उनले अमानवीय कार्य भनेका छन्।
