पोखरा एभेन्जर्स र कर्णाली याक्सको सामना आज

पोखरा, २५ मंसिर। नेपाल प्रिमियर लिग (एनपीएल) २०२४ मा आजको खेल पोखरा एभेन्जर्स र कर्णाली याक्सबीच भइरहेको छ। पोखराले टस जितेर ब्याटिङ रोजेको छ। पोखरा एभेन्जर्स हाल २ अंकसहित पाँचौं स्थानमा रहेको छ। उसले तीन खेलमा एक जित र दुई हार बेहोरेको छ। पहिलो खेलमा चितवनसँग ८७ रनले र दोस्रो खेलमा जनकपुरसँग सात विकेटले हार्यो, जबकि तेस्रो खेलमा लुम्बिनी लायन्सलाई १० विकेटले हरायो।

कर्णाली याक्स चार खेलमा दुई जित र दुई हारसहित ४ अंक जोडेर चौथो स्थानमा छ। कर्णालीले पहिलो खेलमा जनकपुरसँग आठ विकेटले र दोस्रो खेलमा काठमाडौँ गुर्खाजसँग तीन विकेटले हार बेहोरेको थियो। त्यसपछि कर्णालीले चितवनलाई ६ विकेटले र विराटनगरलाई सात रनले हराएको छ। यो आजको दोस्रो खेल हो। बिहानको खेलमा लुम्बिनीले चितवनलाई ३३ रनले पराजित गर्दै पहिलो जित निकालेको थियो।