पोखरा, २६ पुस। राष्ट्रिय स्वतन्त्र पार्टीका सभापति रवि लामिछाने कास्की जिल्ला प्रहरीको हिरासतबाट ८४ दिनपछि रिहा भएका छन्। जिल्ला अदालत कास्कीले ६५ लाख रुपैयाँ धरौटीमा रिहा गर्न आदेश दिएपछि बैंक ग्यारेन्टीमार्फत धरौटी रकम बुझाएर उनले हिरासत छाडेका हुन्।
अदालती प्रक्रिया पूरा भएपछि रविसहित सबै प्रतिवादीलाई पोखरास्थित फिस्टेल अस्पतालमा स्वास्थ्य परीक्षणका लागि लगिने भएको छ। राष्ट्रिय स्वतन्त्र पार्टीका प्रवक्ता मनिष झाले हिरासत मुक्त भएपछि अदालतका आवश्यक प्रक्रिया सम्पन्न गर्न केही समय लागेको जानकारी दिए। उनले भने, “सभापति सहित सबै प्रतिवादीहरू अदालतमै हुनुहुन्छ। आजै स्वास्थ्य परीक्षण हुनेछ भन्ने जानकारी प्राप्त भएको छ।”
स्रोतका अनुसार लामिछानेलाई अन्य जिल्ला अदालतमा दर्ता रहेका मुद्दाको प्रक्रियामा उपस्थित हुने सर्तमा रिहा गरिएको हो। लामिछानेसहित सातैजनामाथि ठगी, संगठित अपराध र सम्पत्ति शुद्धीकरणको अभियोगमा मुद्दा दायर भएको थियो।
जिल्ला अदालत कास्कीका न्यायाधीश नीतिज राईको इजलासले साता लामो थुनछेक बहसपछि बिहीबार साँझ सबै आरोपितलाई धरौटीमा रिहा गर्ने आदेश दिएको थियो। अन्य प्रतिवादीहरूमध्ये छविलाल जोशीलाई ८८ लाख, लीलामाया पछाईंलाई ३७ लाख, र अरूलाई फरक-फरक धरौटी रकम मागिएको थियो।
यो रिहाइसँगै लामिछानेको राजनीतिक र कानुनी यात्रामा नयाँ अध्याय सुरु भएको देखिन्छ। यद्यपि, काठमाडौं, चितवन, बुटवल, र वीरगञ्जका अन्य सहकारी ठगी मुद्दाहरूको प्रक्रिया बाँकी नै छ।
