पोखरा, १० माघ । अमेरिकी राष्ट्रपति डोनाल्ड ट्रम्पले रुसी राष्ट्रपति भ्लाडिमिर पुटिनलाई युक्रेनविरुद्धको युद्ध तत्काल रोक्न आग्रह गर्दै अन्यथा थप आर्थिक प्रतिबन्ध लगाउने चेतावनी दिएका छन्। उनले रुस-युक्रेन युद्धलाई अन्तर्राष्ट्रिय स्थायित्वका लागि ठूलो चुनौतीको रूपमा चित्रित गरेका छन्।
यमनमा इरानको सहयोगमा सञ्चालन हुने हाउथी समूहलाई ट्रम्पले वैदेशिक आतङ्कवादी सङ्गठन घोषित गरेका छन्। हाउथी समूह यमन, साउदी अरेबिया, र संयुक्त अरब इमिरेट्समा भएका धेरै आक्रमणका लागि जिम्मेवार मानिन्छ। ट्रम्पको यो कदमले मध्यपूर्वमा अमेरिकी रणनीतिलाई अझ बलियो बनाउने उद्देश्य लिएको विश्लेषकहरू बताउँछन्।
दक्षिणी सीमामा १५ सय सैनिक परिचालन गर्ने निर्णय गरेका ट्रम्पले ती सेनालाई कानुनी कारबाहीका लागि नभई सीमामा भौतिक संरचना निर्माणका लागि खटाउने जनाएका छन्। यो कदम आप्रवासन रोक्न र सीमा सुरक्षा बलियो बनाउन उठाइएको हो।
यसैबीच, अमेरिकी संसद्ले आप्रवासी विधेयकलाई २६३-१५६ को मतान्तरले पारित गरेको छ। यो विधेयकले आप्रवासन सम्बन्धी कडा नीति लागू गर्ने आधार तयार गरेको छ। यससँगै ट्रम्पले कुनै पनि प्रकारका शरणार्थीलाई अमेरिका प्रवेश निषेध गर्ने घोषणा गरेका छन्।
राष्ट्रपति ट्रम्पको यी पछिल्ला नीतिहरूले अन्तर्राष्ट्रिय सम्बन्ध र आप्रवासन सम्बन्धी अमेरिकी रणनीतिमा ठूलो प्रभाव पार्ने देखिएको छ।
