पोखरा, २५ माघ । पर्यटन राजधानी पोखरामा आज विभिन्न कार्यक्रमहरूको आयोजना हुँदैछ। पोखरा भ्रमण वर्ष २०२५ को औपचारिक घोषणा सभाको सन्दर्भमा मूल समारोह समितिको पहिलो बैठक पोखरा सभागृहमा दिउँसो २ बजे बस्नेछ। त्यस्तै पोखरा उद्योग वाणिज्य संघको सम्मान कार्यक्रम बिहान ८ बजे पोखरा उद्योग वाणिज्य संघको परिसरमा आयोजना गरिनेछ।
यस्तै, पश्चिमाञ्चल क्याम्पस लामाचौरमा बिहान १० बजे ‘उडान’ नामक विशेष छलफल कार्यक्रमको आयोजना हुँदैछ। प्रविधि, नवाचार तथा शिक्षा क्षेत्रमा केन्द्रित रहेर आयोजना गरिने उक्त कार्यक्रममा विषय विशेषज्ञहरू, विद्यार्थी तथा सरोकारवालाहरूको सहभागिता रहने अपेक्षा गरिएको छ।
यसैगरी, पोखराको खेलकुद प्रेमीहरूको ध्यान तान्ने २४ औं आहा रारा गोल्ड कप फुटबल प्रतियोगिता चलिरहेको छ। साहारा क्लब पोखराको आयोजनामा पोखरा रंगशालामा दिउँसो २ बजे आजको खेल हुनेछ। प्रतियोगितामा विभिन्न राष्ट्रिय तथा अन्तर्राष्ट्रिय फुटबल क्लबहरूको सहभागिता रहेको छ।
पोखरा महानगरपालिकाले नगर क्षेत्रभित्र सञ्चालन हुने कुनै पनि सार्वजनिक महत्त्वका कार्यक्रमहरू पूर्वअनुमति लिएर मात्र गर्न अनुरोध गरेको छ। महानगरपालिकाले सार्वजनिक स्थलमा आयोजना हुने औपचारिक तथा अनौपचारिक कार्यक्रमहरू अनिवार्य रूपमा दर्ता गर्न सम्बन्धित सबैमा आग्रह गरेको छ।
