पोखरा, २८ फागुन। प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओली राजामहाराजाझैं सडक खाली गराएर सवारी चलाउने गरेको आरोप लगाएका छन्। मंगलबार प्रतिनिधिसभा बैठकमा सम्बोधन गर्दै प्रचण्डले सरकारले लिएको स्वेच्छाचारी प्रवृत्तिका कारण प्रतिगमनकारी शक्तिहरू बलियो बन्दै गएको बताए।
उनले प्रधानमन्त्री ओलीलाई लक्षित गर्दै भने, ‘लोकतन्त्रमा सरकारले नागरिकलाई नियन्त्रणमा लिने हक राख्छ? हिजो राजामहाराजाझैं पूरै सडक खाली गरेर सवारी चलाउने सनक चढ्छ हाम्रा प्रधानमन्त्रीजीलाई। के लोकतन्त्रले यस्तो राजसी ठाँट स्वीकार गर्छ?’
प्रचण्डले सरकारको नीतिले लोकतन्त्रप्रति जनताको भरोसा घट्ने चेतावनी दिए। उनले सत्तारुढ दलका कार्यकर्ताले नै सुरक्षाकर्मीमाथि आक्रमण गर्ने घटनाहरूले दण्डहीनतालाई प्रश्रय दिएको बताए।
सरकारका गलत गतिविधिले प्रतिगमनकारीहरूको मनोबल बढेको भन्दै उनले यस्तो प्रवृत्तिविरुद्ध सचेत हुन आग्रह गरे। ‘यदि यो गलत कार्यलाई हेक्का राखिएन भने भविष्य अझ गम्भीर र चुनौतीपूर्ण हुन सक्छ,’ उनले थपे।
