पोखरा, १९ मंसिर। भारतको प्रहरीले म्यानमारका ड्रग तस्करहरूले एलन मस्कको स्टारलिङ्क उपग्रह इन्टरनेट उपकरण प्रयोग गरेर भारतीय समुद्री क्षेत्र हुँदै तस्करी गरेको दाबी गरेको छ। बिबिसीका अनुसार, यस घटनाले भारतको सुरक्षा निकायलाई नयाँ चुनौती थपेको छ।
स्टारलिङ्कले आफ्नो सेवालाई विश्वको कुनै पनि कुनामा उपलब्ध गराउने दाबी गरेको छ, तर यसले भारत र यसको समुद्री क्षेत्रमा सेवा प्रदान गर्न अनुमति पाएको छैन।
पछिल्लो हप्तामा भारतीय तटरक्षक बलले अण्डमान र निकोबार टापु नजिकै म्यानमारको एक नौकाबाट यो उपकरण फेला पारेको थियो। उक्त नौकाबाट ६,००० किलोग्राम मेथाम्फेटामिन बरामद भएको बताइएको छ, जसको मूल्य करिब ४.२५ अर्ब अमेरिकी डलर अनुमान गरिएको छ।
तस्करीको नयाँ तरिका
प्रहरीले तस्करीका लागि उपग्रह इन्टरनेट प्रयोग गरिएकाले यस घटनालाई गम्भीर रूपमा लिएको छ। अण्डमानका प्रहरी प्रमुख हरगोविन्दर एस ढलिवालका अनुसार, तस्करहरूले म्यानमारबाट आफ्नो यात्रा सुरु गरेदेखि नै स्टारलिङ्क उपकरणमार्फत वाइफाइ हटस्पट बनाइरहेको पाइएको छ।
यो उपकरण कम्प्याक्ट र पोर्टेबल भएकोले सजिलै साथ बोक्न सकिने स्टारलिङ्कको वेबसाइटमा उल्लेख छ।
अनुसन्धान र स्टारलिङ्कलाई सोधपुछ
अण्डमान प्रहरीले स्टारलिङ्कलाई उपकरणको खरिदकर्ता, खरीद मिति र प्रयोगको विवरण माग गर्दै पत्राचार गरेको छ। स्थानीय र विदेशी गिरोहहरूको संलग्नताको समेत अनुसन्धान भइरहेको जनाइएको छ।
स्टारलिङ्कले सन् २०२१ देखि भारतमा सेवा सुरु गर्ने लक्ष्य राखेको भए पनि कानुनी प्रक्रिया र प्रतिस्पर्धाका कारण ढिलाइ भइरहेको छ। यसले भारतीय अर्बपति मुकेश अम्बानीको रिलायन्स जिओसँग तीव्र प्रतिस्पर्धा सामना गर्नुपर्नेछ।
बिबिसीका अनुसार, भारतीय सुरक्षा निकायहरूले यो घटनालाई गम्भीरताका साथ अध्ययन गरिरहेको छ, किनभने यसले कानुनी प्रक्रियालाई अवमूल्यन गरेर समुद्री सुरक्षामा चुनौती थपेको छ।
