कुश्मा, ७ माघ। पर्वतको सदरमुकाम कुश्माबजारमा सञ्चालित गुप्तेश्वर बहुमुखी क्याम्पस र शिवालय बहुमुखी क्याम्पस अब एकीकृत भएका छन्। आर्थिक मन्दी, सरकारको असहयोग र विद्यार्थीको संख्या घट्दै जानुका कारण क्याम्पसलाई एकत्रित गर्ने निर्णय गरिएको हो। अब, यी दुई क्याम्पसलाई मिलाएर नयाँ नाम ‘कुश्मा बहुमुखी क्याम्पस’ राखिएको छ। त्रिभुवन विश्वविद्यालयले यस एकीकरणलाई अनुमति दिएको छ।
गुप्तेश्वर क्याम्पस २०४८ र शिवालय क्याम्पस २०६७ देखि सञ्चालनमा थिए। क्याम्पस एकीकरणका लागि शिवालय क्याम्पसका पूर्व व्यवस्थापन समिति अध्यक्ष गोविन्द पहाडीको संयोजकत्वमा समिति गठन गरिएको थियो। शनिबार समितिले एकीकरणका लागि अन्तिम निर्णय गरेपछि, क्याम्पसको प्रशासनिक, शैक्षिक र सञ्चालन खर्चलाई व्यवस्थापन गर्ने नयाँ योजना तयार गरिएको छ।
क्याम्पस एकीकरण पछि, गुप्तेश्वर क्याम्पसमा २ सय ६२ र शिवालय क्याम्पसमा २ सय ६८ विद्यार्थी रहेका छन्। विद्यार्थीको संख्या घट्दै गएपछि क्याम्पस एकीकरणको आवश्यकता महशुस गरिएको थियो। एकीकृत क्याम्पसले एक सवल र आधुनिक क्याम्पसको रुप लिने विश्वास गरिएको छ।
क्याम्पस एकीकरणपछि, दुवै क्याम्पसका कक्षाहरू विद्यार्थी र प्राध्यापकको अनुकूलताअनुसार एकीकृत रूपमा सञ्चालन हुनेछन्। गुप्तेश्वर क्याम्पस कुश्माबजारमा र शिवालय क्याम्पस झण्डै दुई किलोमिटर टाढा छमर्केमा रहेको छ। यसरी एकीकृत क्याम्पसका विद्यार्थीलाई सहजता हुने अपेक्षा गरिएको छ।
