पोखरा, १६ माघ । उपराष्ट्रपति रामसहायप्रसाद यादवले शहीद दिवसको अवसरमा शहीदहरूको बलिदानलाई सम्मान गर्दै सामाजिक, आर्थिक र स्वावलम्बी अर्थतन्त्रसहित सुदृढ मुलुक निर्माणका लागि उनीहरूको साहस सबैका लागि प्रेरणा भएको बताएका छन्।
उपराष्ट्रपति यादवले मुलुकको स्वतन्त्रता, सार्वभौमिकता, भौगोलिक अखण्डता र समावेशिता सुनिश्चित गर्ने उद्देश्यले जीवन अर्पण गर्ने शहीदहरूको योगदानलाई स्मरण गर्दै श्रद्धाञ्जली अर्पण गरेका छन्। उनले शहीदहरूको बलिदानले नेपाललाई स्वतन्त्र, समृद्ध र शान्त मुलुक बनाउन प्रेरणा दिएको उल्लेख गरे।
उनले शहीदहरूको सपना साकार पार्न, न्यायपूर्ण र समानतामूलक समाज निर्माण गर्ने संकल्प लिन आवश्यक रहेको बताएका छन्। यादवले मुलुकको दिगो शान्ति, समृद्धि र अखण्डताको लागि राष्ट्रिय एकतामा काम गर्नुपर्ने पनि बताएका छन्।
उपराष्ट्रपति यादवले मुलुकको विकास र शान्तिको आकांक्षा पूरा गर्न राजनीतिक दल र नागरिक समाज सबैलाई दृढ सङ्कल्पका साथ लाग्न आह्वान गरेका छन्।
