पोखरा, २६ फागुन। राजतन्त्रको पुनर्स्थापनाको पक्षधर राष्ट्रिय प्रजातन्त्र पार्टी (राप्रपा)ले काठमाडौं महानगरपालिकालाई एक लाख रुपैयाँ जरिवाना तिरेको छ। राप्रपा प्रवक्ता ज्ञानेन्द्र शाही महानगरपालिकाको कार्यालयमै पुगेर जरिवाना बुझाएका हुन्।
पूर्वराजा ज्ञानेन्द्र शाहको स्वागतमा गरिएको प्रदर्शनका क्रममा भएको फोहोर तथा सम्पत्ति क्षतिको कारण महानगरले राप्रपालाई जरिवाना तोकेको थियो। पार्टीले जरिवाना तिरेपछि प्रवक्ता शाहीले सामाजिक सञ्जाल फेसबुकमा तस्बिर राख्दै राप्रपाले सुशासन र विधिको शासनलाई सम्मान गर्ने बताए। उनले लाखौँ नागरिकको उपस्थितिमा बाटोमा केही फोहोर हुन सक्ने उल्लेख गर्दै महानगरको निर्णयलाई स्वीकार गरेको बताए।
उक्त प्रदर्शनमा राप्रपा नेपाल र अभियन्ता दुर्गा प्रसाईंका समर्थकहरू पनि सहभागी थिए। तर, महानगरपालिकाले जरिवाना भने केवल राजेन्द्र लिङ्देन नेतृत्वको राप्रपालाई मात्रै गरेको छ। यसले केही राजावादी समर्थकहरूलाई असन्तुष्ट बनाएको देखिन्छ।
राप्रपाले यस घटनालाई सुशासनप्रतिको आफ्नो प्रतिबद्धताका रूपमा चित्रण गरे पनि जरिवाना तिर्नुपरेको विषयमा पार्टीभित्र र बाहिर विभिन्न खालका प्रतिक्रिया देखिएका छन्।
