पोखरा, २३ वैशाख। राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानेन्द्र शाहीले प्रतिनिधिसभाको बैठकमा कसैको राजनीतिक आस्थामाथि प्रहार नगर्न चेतावनी दिएका छन्। नीति तथा कार्यक्रममाथिको छलफलमा भाग लिँदै सांसद शाहीले राजसंस्थालाई छलकपटबाट फालिएको दाबी गर्दै पूर्वराजा ज्ञानेन्द्र शाहलाई बाघको संज्ञा दिए।
उनले प्रतिनिधिसभामा ‘बाघ होइन’ भन्ने भनाइप्रति प्रतिक्रिया जनाउँदै ‘रङ मिल्यो भन्दैमा बिरालो बाघ बन्न सक्दैन’ भन्ने टिप्पणी गरे। शाहीले राजसंस्थालाई देशको पहिचानसँग जोडेर वर्तमान राजनीतिक परिवर्तनलाई विदेशीको निर्देशनमा आएको आरोप लगाए। संविधान र व्यवस्था विदेशीले थोपरेको भन्दै उनले १२ बुँदे सम्झौतादेखि नेताहरूको भूमिगत गतिविधिसम्म विदेशमा तय भएको बताए।
सांसद शाहीको भनाइले पुनः राजसंस्था र वर्तमान राजनीतिक व्यवस्थामाथि बहसलाई तातो बनाएको छ। उनले वर्तमान सत्ताको वैधानिकता र नैतिकतामाथि प्रश्न उठाएका छन् भने राजसंस्थाको पुनर्स्थापनाका लागि जनभावना बढ्दो रहेको तर्क पनि प्रस्तुत गरेका छन्।
