पोखरा, २९ वैशाख। एप्पलका वरिष्ठ कार्यकारी एडी क्युले आगामी दस वर्षमा स्मार्टफोनको भविष्य परिवर्तन हुने संकेत गरेका छन्। गुगल सर्च एंटिट्रस्ट मुद्दामा बोलेका क्युले भने, “अबदेखि १० वर्षपछि तपाईंलाई आइफोनको आवश्यकता नपर्ला।” उनको यो भनाइ एआई (कृत्रिम बुद्धिमत्ता) को तीव्र विकाससँग सम्बन्धित छ, जसले स्मार्टफोनको प्रयोगमा ठूलो प्रभाव पार्ने सम्भावना औंल्याएको छ।
एडी क्युका अनुसार, एआई प्रविधिको द्रुत गति र प्रभावले आइफोन जस्ता स्मार्टफोनहरू पुराना र अप्रासंगिक बनाउन सक्छ। एप्पलले हालसम्म सिरी जस्ता एआई आधारित सेवाहरूलाई सफलतापूर्वक सञ्चालन गर्न नसके पनि कम्पनीले भविष्यमा एआई प्रविधिमा ठूलो लगानी गर्ने योजना बनाएको छ। क्युले एप्पलको इतिहास सम्झाउँदै भने, “एप्पलले आइपडलाई अन्त्य गरेर आइफोन ल्यायो, अब एआईको विकाससँगै आइफोनको इतिहास फेरि दोहोरिन सक्छ।”
अहिलेको अवस्थामा, एप्पलका लागि एआई एक चुनौतीपूर्ण क्षेत्र बनेको छ। एआईको तीव्र विकासलाई कम्पनीले भविष्यमा ठूलो शक्ति बन्न सक्ने सम्भावना देखेको छ। यद्यपि क्युका टिप्पणीहरूले एप्पललाई उद्योगको सानो हिस्सा जस्तो देखाउनका लागि गर्नुभएको हुनसक्ने अनुमान पनि गरिएको छ, जसले नियामक निकायहरूको निगरानीबाट बच्न मद्दत पुर्याउन सक्छ।
