पोखरा, ३० वैशाख। स्पानिस क्लब रियल मड्रिडका प्रशिक्षक कार्लो एन्सेलोटीले आगामी सिजनको अन्त्यमा क्लब छाड्ने निर्णय गरेका छन्। ६५ वर्षीय इटालियन प्रशिक्षकले २६ मेमा ला लिगा सिजन सकिएपछि ब्राजिलियन राष्ट्रिय फुटबल टिमको जिम्मेवारी सम्हाल्नेछन्।
ब्राजिल फुटबल फेडेरेसन (सीबीएफ) ले सोमबार एन्सेलोटीलाई आगामी समयका लागि ब्राजिलको नयाँ प्रशिक्षकको रूपमा घोषणा गरेको हो। सीबीएफका अध्यक्ष एडनाल्डो रोड्रिगेजले यसलाई एक रणनीतिक कदमका रूपमा प्रस्तुत गर्दै, एन्सेलोटीलाई इतिहासकै महान प्रशिक्षक भन्दै उनको नेतृत्वमा ब्राजिल फुटबलले नयाँ सफलता हासिल गर्ने विश्वास व्यक्त गरेका छन्।
एन्सेलोटीले सन् २०२६ को फिफा विश्वकपसम्म ब्राजिलको प्रशिक्षकको रूपमा कार्य गर्नेछन्। उनका अनुसार, आगामी विश्वकप छनोट खेलहरूमा उनले इक्वेडर र पराग्वे विरुद्धका खेलहरूबाट आफ्नो कार्यकालको थालनी गर्नेछन्।
रियल मड्रिडमा १५ प्रमुख उपाधि जितेका एन्सेलोटीले गत सिजन च्याम्पियन्स लिग र ला लिगामा रियल मड्रिडलाई सफलता दिलाएका थिए। अब, उनले सान्टियागो बर्नाबेउ छोडेर ब्राजिलको राष्ट्रिय टिमको नेतृत्व गर्ने छन्, जसले फुटबलको इतिहासमा नयाँ अध्याय थप्ने अपेक्षा गरिएको छ।
