पोखरा, ३० वैशाख। शहीद स्मारक ‘बी’ डिभिजन लिग अन्तर्गत सोमबार सम्पन्न दुई खेलमा आरसिटीले ब्रिगेड ब्वाइज क्लबलाई पराजित गर्दै रेलिगेसनको खतराबाट अगाडि बढेको छ भने झापा फुटबल क्लबले नयाँबस्ती युथ क्लबलाई हराउँदै रेलिगेसनको दबाब चर्काएको छ।
सातदोबाटोस्थित एन्फा कम्प्लेक्समा भएको पहिलो खेलमा आरसिटीले ब्रिगेड ब्वाइजलाई २–१ ले हराएको हो। खेलको १४औं मिनेटमा अजित गुरुङले गोल गर्दै आरसिटीलाई अग्रता दिलाए भने निखिल तामाङले ३७औं मिनेटमा दोस्रो गोल गर्दै अग्रता दोब्बर बनाए। इन्जुरी टाइममा अभिषेक राना मगरले ब्रिगेडका लागि एक सान्त्वना गोल फर्काए तापनि हार टार्न सकेनन्।
लगातार दोस्रो जित निकालेको आरसिटीले यसअघि च्यासल युथ क्लबलाई ३–२ ले पराजित गरेको थियो। अब ११ खेलबाट १४ अंक जोडेको आरसिटी लिग तालिकाको सातौं स्थानमा पुगेको छ। यस जितसँगै उसले रेलिगेसनको खतरा कम गरेको छ भने ब्रिगेड ब्वाइज १२ अंकसहित १०औं स्थानमा खस्किएको छ। अब ब्रिगेडले बाँकी दुई खेलमा जित हासिल गर्नैपर्ने दबाब छ।
सोमबारकै दोस्रो खेलमा झापा फुटबल क्लबले नयाँबस्ती युथ क्लबलाई ३–१ को अन्तरले हराएको छ। झापाको जितमा राजेश दाहालले दुई गोल गरे भने बबिन बोहराले एक गोल थपे। बबिनले पाँचौं मिनेटमै अग्रता दिलाएपछि राजेशले ३९औं र ८५औं मिनेटमा गोल गर्दै झापाको जित सुनिश्चित गरे। नयाँबस्तीका सुमन योङ्ग्याले ६८औं मिनेटमा एक गोल फर्काएका थिए।
जितपछि झापाले ११ खेलमा १५ अंक जोड्दै लिगको पाँचौं स्थानमा उक्लिएको छ। हारसँगै नयाँबस्ती भने ८ अंकमै सीमित रहँदै तालिकाको पुछारमा छ। रेलिगेसन टार्न बाँकी खेल जित्नुका साथै अन्य टिमको नतिजामा भर पर्नुपर्ने अवस्था नयाँबस्तीको छ।
