सुर्खेत । नेकपा (एकीकृत समाजवादी) कर्णाली प्रदेश कमिटीको प्रथम अधिवेशनले ठगेन्द्र प्रकाश पुरीलाई सर्वसम्मत अध्यक्षमा चयन गरेको छ। सोमबारदेखि सुरु भएको अधिवेशनले पुरीलाई अध्यक्षमा निर्वाचित गर्दै कर्णाली प्रदेशको नेतृत्वको जिम्मेवारी सुम्पिएको हो। पुरीले प्रदेश कमिटीलाई एकताबद्ध राख्दै पार्टीको संगठन विस्तार र सुदृढीकरणमा सक्रिय भूमिका खेल्ने अपेक्षा गरिएको छ।
अधिवेशनले अन्य पदहरूमा पनि सर्वसम्मत चयन गरेको छ। धिरबहादुर बिष्टलाई सचिव र धन कुमारी जिसीलाई उपसचिवमा निर्वाचित गरिएको छ। नवनिर्वाचित पदाधिकारीहरूलाई कमिटीका सदस्यहरू र सहभागी प्रतिनिधिहरूले शुभकामना दिएका छन्। एकीकृत समाजवादीले कर्णाली प्रदेशमा १४१ सदस्यीय प्रदेश कमिटी गठन गरेको छ, जसले प्रदेशभर पार्टीको गतिविधि सञ्चालन गर्नेछ।
अधिवेशनले कर्णाली प्रदेशको राजनीतिक परिप्रेक्ष्यमा एकीकृत समाजवादीको भूमिका मजबुत बनाउन र आगामी दिनमा प्रदेशको विकास र समृद्धिका लागि विभिन्न कार्यक्रमहरू अघि बढाउने निर्णयसमेत गरेको छ। नवनिर्वाचित अध्यक्ष पुरीले कर्णाली प्रदेशमा एकीकृत समाजवादीको संगठनलाई थप प्रभावकारी बनाउँदै पार्टीको नीति र कार्यक्रमहरूलाई जनतासम्म पुर्याउन काम गर्ने प्रतिबद्धता व्यक्त गरेका छन्।
यो अधिवेशनले पार्टीका नेताहरूलाई एकताबद्ध गर्दै आगामी चुनौतिहरू सामना गर्न दृढ संकल्पका साथ अघि बढ्न प्रेरणा दिने विश्वास गरिएको छ।
