पोखरा, १६ फागुन। काठमाडौं महानगरपालिकाले विद्यार्थीमा शैक्षिक सुधार तथा नवीन सिकाइ पद्धति अभिवृद्धि गर्ने उद्देश्यसहित ‘शैक्षिक मेला २०८१’ को आयोजना गरेको छ। फागुन १६ र १७ गतेसम्म प्रदर्शनीमार्गस्थित राष्ट्रिय सभागृहमा सञ्चालन हुने मेलाले सामुदायिक विद्यालयमा थालिएका कार्यक्रमबाट विद्यार्थीमा परेको प्रभाव उजागर गर्नुका साथै सिकाइ आदानप्रदान गर्ने अवसर प्रदान गर्नेछ।
महानगरका प्रवक्ता नवीन मानन्धरका अनुसार, मेलाले विद्यालय शिक्षाको स्तरोन्नतिका लागि नयाँ दृष्टिकोण प्रस्तुत गर्नुका साथै आगामी योजनाहरूको आधार तय गर्नेछ। यस अवसरमा विद्यालय र शैक्षिक संस्थाहरूबीच सहकार्य गर्दै विद्यार्थीको व्यावहारिक ज्ञानलाई प्रवर्द्धन गर्ने उद्देश्य लिइएको छ।
शैक्षिक नवप्रवर्तनको प्रदर्शन
महानगरका सहरी योजना आयोगका सदस्य इन्जिनियर शैलेन्द्र झाले विद्यालय शिक्षालाई वैज्ञानिक, व्यावहारिक तथा विद्यार्थीको रूचिअनुरूप सञ्चालन गर्न सामुदायिक विद्यालयहरूमा विविध कार्यक्रम कार्यान्वयन गरिएको बताए। यसैक्रममा, शैक्षिकसत्रको अन्त्यमा हुने लिखित परीक्षासँगै व्यावहारिक र प्रयोगात्मक सिकाइका नतिजा पनि मूल्यांकन गरिने नीति अवलम्बन गरिएको जानकारी उनले दिए।
मेलाका निमित्त शिक्षा अधिकारी केशव ज्ञवालीका अनुसार, मेलामा शैक्षिक गुणस्तर सुधार, बालबालिकाको शारीरिक, मानसिक तथा चारित्रिक विकास, विद्यालय पूर्वाधार र शिक्षकहरूको क्षमता अभिवृद्धिलगायतका पक्षलाई समेटिएको छ।
विद्यार्थीको सिर्जनशील सहभागिता
मेलाको आकर्षणका रूपमा विद्यार्थीहरूका लागि ‘बुक फ्री फ्राइडे’ अन्तर्गतका ३५ शैक्षिक उपसमूहका स्टलहरू रहनेछन्। विद्यार्थीहरूले नवीनतम सिकाइका गतिविधि प्रदर्शन गर्नुका साथै विद्यालय शिक्षाका विभिन्न नवप्रवर्तनका नमुना प्रस्तुत गर्नेछन्।
नेपाल भाषा सिकाइ विधि, मौलिक संस्कृति र वेशभूषा झल्काउने प्रदर्शनीका साथै परम्परागत बाजा तथा गायन प्रस्तुति मेलाका थप विशेषता रहनेछन्। यस्तै, सामुदायिक विद्यालयहरूले दिवा खाजाका रूपमा १० स्टलमार्फत निःशुल्क खाजाको व्यवस्था मिलाएका छन्।
अनुभव आदानप्रदान र सिकाइ प्रदर्शनी
मेलामा विद्यार्थी नमूना संसद् अभ्यासको अवसर पाइनेछ, जसमा उनीहरूले विधायन प्रक्रियाबारे जानकारी लिनेछन्। ‘बुक फ्री फ्राइडे’ उपसमूहअन्तर्गत मरूहिटी पानी परीक्षण विधि, विद्यार्थीहरूका अनुभव समेटिएका एक हजारभन्दा बढी स्केचिङ र मूर्तिकलाहरू, टिचर कलेज प्रोग्रामसम्बन्धी गतिविधि तथा सिकाइ सुधारका अभ्यासहरू प्रदर्शनीमार्फत अवलोकन गर्न सकिनेछ।
महानगरभित्र ८७ सामुदायिक विद्यालयमा ६१ हजार तीन सय २९ विद्यार्थी तथा ५२४ संस्थागत विद्यालयमा दुई लाख १० हजार नौ सय ३४ विद्यार्थी अध्ययनरत छन्। महानगरले यी विद्यार्थीहरूको सिकाइ अनुभवलाई उन्नत बनाउन निरन्तर नवीन प्रयास गरिरहेको बताइएको छ।
