पोखरा, १६ पुस । पोखराको फेवातालमा सम्पन्न अन्तर्राष्ट्रिय मैत्रीपूर्ण ड्रागन बोट रेसमा चिनियाँ टोलीले दुवै विधाको उपाधि जित्दै उत्कृष्ट प्रदर्शन गरेको छ। आइतबार र सोमबार सम्पन्न २०० र ५०० मिटर इभेन्टमा चिनियाँ टोली डोङग्वान लाओयू क्लबले पहिलो स्थान हासिल गर्यो। नेपाली टोली उपाधिविहीन रहँदा चिनियाँ टोलीले उत्कृष्ट नतिजा निकाल्न सफल भयो।
२० टिमको सहभागितामा सम्पन्न प्रतियोगितामा डोङग्वान लाओयू क्लबले २०० मिटर रेसमा ४७.७२० सेकेण्डमा दूरी पूरा गर्दै शीर्ष स्थान हासिल गर्यो। सोही इभेन्टमा युन्नान मिन्जु युनिभर्सिटी दोस्रो स्थानमा रहँदा लाइओचेङ युनिभर्सिटीले तेस्रो स्थान हात पार्यो। ५०० मिटर रेसमा पनि डोङग्वानले उत्कृष्ट प्रदर्शन गर्दै २.०४.४७० मिनेटमा दूरी पार गर्यो। यो रेसमा लाइओचेङ युनिभर्सिटी दोस्रो र युहान स्पोर्ट्स युनिभर्सिटी तेस्रो भए।
दुवै विधामा जित हासिल गरेको डोङग्वान लाओयू क्लबले ५–५ हजार अमेरिकी डलर (नेपाली करिब ६ लाख ७९ हजार रुपैयाँ) नगद पुरस्कार प्राप्त गर्यो। उपविजेताले २ हजार डलर (करिब २ लाख ७१ हजार) र तेस्रो स्थान हासिल गर्ने टोलीले १२०० डलर (करिब १ लाख ६३ हजार) पुरस्कारका साथ प्रमाणपत्र र ट्रफी पनि पाए। सबै सहभागी टोलीलाई ५०० डलर (करिब ६८ हजार) नगद पुरस्कार प्रदान गरियो।
गण्डकी प्रदेश सरकार, पोखरा महानगरपालिका, नेपालस्थित चिनियाँ दूतावास, र नेपाल पर्यटन बोर्डको संयुक्त आयोजनामा दोस्रो पटक ड्रागन बोट रेस फेस्टिभल सम्पन्न भएको हो। नेपाल ड्रागन बोट एसोसिएसन, पोखरा पर्यटन परिषद्, र पोखरा ओभरसिज चाइनीज एसोसिएसनले सहआयोजनामा महत्वपूर्ण भूमिका निर्वाह गरे।
यो खेल प्रतियोगिताले पोखराको पर्यटन प्रबद्र्धनसँगै नेपाल–चीन सम्बन्धलाई सुदृढ बनाएको युवा तथा खेलकुद मन्त्री तेजुलाल चौधरीले उद्घाटन समारोहमा उल्लेख गरे। प्रतियोगितामा नेपालका ११, चीनका ८, र सिंगापुरको १ टोली सहभागी थिए। हरेक टोलीमा १२ खेलाडी सहभागी थिए, जसमा एकले ड्रम बजाएर अन्य खेलाडीलाई ताल प्रदान गर्थे।
विजेता टोलीलाई गण्डकी प्रदेशका मुख्यमन्त्री सुरेन्द्रराज पाण्डे, पोखरा महानगरपालिकाका प्रमुख धनराज आचार्य, र नेपालका लागि चीनका राजदूत छन् सोङले पुरस्कार वितरण गरे।
गत असारमा पनि फेवातालमा ड्रागन बोट रेसको संस्करण आयोजना भएको थियो। यसपटक भने चिनियाँ टोलीले आफ्नो वर्चस्व कायम राख्दै नेपाललाई उपाधिबाट वञ्चित गर्यो। गत वर्षको संस्करणमा नेपाल नारा टोलीले दुवै विधामा उपविजेता बनेको थियो।
चिनियाँ टोलीका खेलाडी र प्राविधिक गरी १२९ जनाको समूह सिचुवान एयरलाइन्सको चार्टर विमानमार्फत पोखरा पुगेका थिए। ड्रागन बोट रेस चीनका चार प्रमुख परम्परागत पर्वमध्ये एक हो, जसले स्वास्थ्य र परम्परागत चिकित्सा उत्सवको रूपमा समेत महत्त्व राख्छ।
