पोखरा, १३ वैशाख। अन्नपूर्ण संरक्षण क्षेत्र आयोजना (एक्याप) जोमसोमका अनुसार, गत वर्ष मुस्ताङ भ्रमण गर्ने विदेशी पर्यटकको संख्या झण्डै ५० प्रतिशतले वृद्धि भएको छ। विसं २०८० मा ९६ हजार ६४५ जना विदेशी पर्यटक मुस्ताङ पुगेका थिए भने २०८१ सालमा यो संख्या बढेर एक लाख ४४ हजार ७४५ पुगेको छ। एक्याप जोमसोम कार्यालयका प्रमुख राजेशप्रसाद गुप्ताका अनुसार, यो वृद्धि ४९ दशमलव ७६ प्रतिशतको रहेको छ।
यो अवधिमा विशेषगरी सार्क राष्ट्रका पर्यटकको उपस्थिति उल्लेखनीय रह्यो। २०८१ सालमा मात्र एक लाख १७ हजार ६१४ जना सार्क मुलुकका पर्यटकले मुस्ताङ भ्रमण गरेका थिए, जुन अघिल्लो वर्षको तुलनामा ५३ दशमलव ७१ प्रतिशतले बढी हो। तीमध्ये ८० प्रतिशत भारतीय पर्यटक थिए, जसले प्रायः मुक्तिनाथ मन्दिर दर्शनका लागि भ्रमण गर्ने गरेका छन्। अन्य मुलुकबाट २७ हजार १३१ जना पर्यटक आएको एक्यापको तथ्याङ्कले देखाउँछ।
वर्षभर विभिन्न महिनामा हजारौं विदेशी पर्यटकले मुस्ताङको भ्रमण गरे। चैतमा सबैभन्दा धेरै २१ हजार ४९१ जना विदेशी पर्यटक आएको थियो। यो सँगै मुस्ताङमा विश्वका ७२ वटा राष्ट्रका नागरिकले भ्रमण गरेको रेकर्ड छ।
पर्यटक आगमनमा देखिएको वृद्धिमा बेनी–जोमसोम–कोरला सडकको सुधार, अन्नपूर्ण चक्रिय पदमार्गको लोकप्रियता, मनाङ हुँदै प्रवेश गर्ने वैकल्पिक मार्गको विकासजस्ता कारणले ठूलो भूमिका खेलेको देखिन्छ। साथै, निलगिरि र धौलागिरि हिमालको दृश्यावलोकन, कालिगण्डकी नदीको तटीय सौन्दर्यता, गुम्बा, माने, स्तुपजस्ता धार्मिक तथा सांस्कृतिक सम्पदाले पनि पर्यटकलाई आकर्षित गरिरहेका छन्।
उपल्लो मुस्ताङका ऐतिहासिक र धार्मिक स्थलहरू, जस्तै मुस्ताङी राजदरबार, लुरी गुम्बा, दामोदरकुण्ड, कागबेनी, मार्फा, ढुम्बाताल, टिटी ताल र सेकुङ ताल पर्यटकको मुख्य गन्तव्य बन्न थालेका छन्। यी सम्पदाहरूको संरक्षण र प्रवर्द्धनसँगै पर्यटकीय पूर्वाधार थप सुदृढ गर्न सके मुस्ताङ पर्यटनको उज्यालो भविष्य निर्माण गर्न सकिने देखिन्छ।
